Kralendijk – Un delegashon di VWS i RIVM a bishitá Boneiru siman pasá. Motibu di nan bishita tabata pa hasi un lastu chekeo di nos preparashon pa loke ta trata e kampaña di bakunashon. Esaki ta loke diputado Nina Den Heyer a bisa den un konferensia di prensa djaluna atardi. ”Nan a tene kombersashon ku tur e aktornan relevante den e kampaña manera por ehèmpel direktor di hospital i Departamentu di Salubridat Públiko i otronan. Tambe a bai mira ku e vrizernan ta funshoná manera debe ser i a inspektá e lokalidatnan kaminda lo bai risibí hende pa pasa angua kontra Coronavírùs, esta bakuná. E parti mas importante tabata e parti ku nan a bin duna training kon tin ku atendé i transportá e bakuna di Pfizer, e asina yama ‘cold chain’. 

Na final a sinta ku kolegio ehekutivo i miembronan di e komishon spesial di CoViD-19 pa duna informashon. Nan ta satisfecho ku lokual nan a mira i ku tur probabilidat nos lo start ku e kampaña di bakunashon den kareda di 15 di febrüari. Manera ta konosí nos lo kuminsá ku e personanan ku ta traha den kuido. Nan lo haña nan bakuna na Fundashon Mariadal i si tur kos kana segun plan lo start ku e personanan di 60+ fin di febrüari. Durante e periodo akí  personanan indokumentá òf ku ta bibando ilegal di 60 aña bai ariba, tambe por pasa bakuná. Despues di e grupo di 60+ nos lo sigui ku sobra habitantenan adulto. 

Ki fecha konkreto nos lo kuminsá ku esaki, ta dependé naturalmente di e momentu ku nos risibí sobrá bakuna. Nos tin kontakto regularmente tokante esaki i manera esaki ta mas konkreto nos lo informá esaki. Loke sí nos por bisa ku e konseho ku e delegashon a duna na ministerio di VWS ta pa nos hasi tur kos den nos alkanse pa a bakuná tur hende ku promé ku temporada di orkan kuminsá, esta 1 di yüni. Esaki ta ambisioso pero nan ta konvensí ku a base di nos plan i preparashon ku nos lo por logr’é. Nos di nos banda lo hasi nos máksimo”, diputado den Heyer a bisa.  

Share This
error: Content is protected !!