KRALENDIJK – ”Importante ta pa nos keda komuniká ku otro komo habitante di Boneiru tokante e bakuna akí. Mi sa ku tin yen di pregunta i kos ku ta biba, pero mi sa tambe ku un kantidat grandi di hende ke haña e bakuna pa kaba. Ta importante pa nos ta konsiente ku tanten un mayoria di nos pueblo no a tuma e bakuna, nos lo mester keda ku sierto medida di seguridat. Esaki manera konosí ta pa nos no buta un preshon fuerte riba nos kuido médiko i nos departamentUnan pa por garantisá yudansa i kuido na tur ku mester. Esaki ta loke diputado Nina Den Heyer a bisa den un konferensia di prensa.

Mi ke bolbe enfatisá ku bakunashon ta un eskoho personal di kada persona I ku mester respetá kada hende su eskoho. Mi ta mirando diskushonnan fuerte riba Facebook kaminda ku ta ataká otro personalmente. Esaki no ta nèchi i no ta algu ku ta yuda. E momentU akí nos mester hala mara ku otro pa huntu sali for di e krísis akí. Komo gobièrnu nos a saka un enkuesta pa asina mira kon dispuesto nos hendenan ta pa bai bakuná. I pa asina nos por duna informashon mas spesífiko. I mi ta bolbe bisa, e bakuna ta un eskoho liber di kada persona i nos lo duna informashon pa kada persona por basa su eskoho a base di bon informashon. E bakuna di Pfeizer ku nos ta bai haña ta seif. Investigashon a prueba esei. Ora yega mi turno mi tambe lo bakuná”, diputado den Heyer a bisa.

Share This
error: Content is protected !!