Kralendijk – Boneiru ta preparando tur ku tin pa kon bai atendé ku pasamentu di e bakuna, ku ta tuma lugá luna di febrüari. Esaki ta loke Joey Van Slobbe, kordinadó di programa di bakunashon a informá. “Nos ta kontentu ku e tim di RIVM siman pasá a haña ku departamentu di Salubridat Públiko ta bon prepará pa kuminsá ku bakunashon. Despues di un yamada ku ‘Tempo Team’ a hasi siman pasá, hendenan ku un bèkgrount médiko i no-médiko a mèldu nan mes siman pasá pa por hasi uso di nan ora di bakuná. Djabièrnè tabata e promé dia ku a skohe e hendenan. Nos por hasi uso di algun hende mas. Hendenan ku un bèkgrount médiko i no-médiko ainda por mèldu nan mes na ‘Tempo Team’ of na ‘Jobcenter’. 

Sitio pa pasa angua
Siudadanonan por pasa angua kontra e Coronavírùs, esta bakuná na tres sitio. Personal di kuido ta bakuná na Fundashon Mariadal. Tur otro suidadano por laga bakuná nan mes na Rincon na Cocari i na Playa na Kompleho Deportivo Jorge Nicolaas. Enfermera- i enfermeronan i asistentenan di dòkter ku a haña treinen spesial ta pasa bo angua. Na tur sitio di pasa angua tin un dòkter presente pa wak si tur kos ta kana bon. 

Na unda i ki dia hendenan por mèldu nan mes?
Momentu e bakunanan yega Boneiru, probablemente 15 di febrüari, ta pidi siudadanonan pa mèldu nan mes pa pasa angua. Manera diputado Den Heyer a bisa, nos ta kuminsá promé ku personal den kuido, despues ku hendenan di 60 aña bai ariba i e indokumentadonan den e grupo. Via korant, radio, televishon i medionan sosial ta hasi un yamada na bo pa mèldu bo mes. Bo por hasi esei via telefòn òf online. Ora ku bo mèldu bo mes bo tin ku kontestá algun pregunta na telefòn òf online tokante bo salú. Si ta nesesario nan ta pidi bo pa tuma kontakto ku bo dòkter di kas pa wak si bo por bakuná. 

Ora bo mèldu bo mes i bo por bakuná, bo ta haña un sita pa e promé angua i e di dos angua. Bo ta haña e di dos angua probablemente tres siman despues di esun promé. Bo ta tende di nos asina ku e bakuna yega i nos sa presis e dia ku ta kuminsá e bakunashon”, Joey Van Slobbe a bisa. 

Share This
error: Content is protected !!