KRALENDIJK – Nombramentu di un Sekretario di Isla (eilandsecretaris) ta un proyekto ku tin mas ku un aña andando i awor a nombra un persona den e funshon. Esaki ta loke diputado Hennyson Thielman a bisa tokante e posishon. “Debí na e pandemia di Coronavírùs, e persona ku a pone su mes disponibel pa e funshon menshoná, no a logra pa bini Boneiru pa hasi e trabou. Despues a bolbe habri e solisitut pa e funshon 1 di novèmber 2019, esaki ta promé ku mi a bira diputado. Kolegio Ehekutivo tabata buska un persona ku eksperensia. Mas o ménos 32 hende ku a solisitá riba e posishon, 28 tabata di eksterior i 4 di Boneiru. Último a keda 2 persona i tabata Wendy Pelk ku a bin na remarke pa e funshon. E ta un persona ku hopi eksperensia den e funshon. Pues ta un persona ku fásilmente por hasi e trabou bon i komprondé e kultura den e aparato públiko. 1 di mart 2021 e ta drenta e funshon ofisial. Tokante dikon a skohe Wendy Pelk, mi no por bisa nada di esei, debí ku mi no tabata den e proseso di negoshamentu. Loke mi a komprondé ta ku a buska hende lokal, a papia ku Bonerianonan ku por hasi e trabou, sinembargo nan no a tuma e tarea. Pa e motibu aki a skohe otro hende. Si ta asina ku lo bai laga un persona lokal kana e trayekto huntu ku Wendy Pelk, pa asina den futuro, despues di 2 aña, e persona por asumí e ròl den e funshon. Huntu ku e mènedjer di kambio i e ‘concerncontroller’, ku mester bini ainda, Pelk por duna un sosten na e ambishon di Kolegio Ehekutivo pa loke ta trata e programa di maneho. E lo yuda tambe pa reforsá e poder di maneho manera palabrá den e akuerdo di gobernashon. Na mes un momento Kolegio Ehekutivo a apuntá un tim di kambio ku ta okupá su mes ku finansa públiko pa un mihó atministrashon finansiero. Asin’ei Kolegio Ehekutivo ta spera pa mehorá e funshonamentu di e aparato públiko i profeshonalisá e servisio“, diputado Hennyson Thielman a bisa.

Wendy Pelk entrante 1 di mart 2021 ta drenta e funshon ofisial komo sekretario di isla.
Share This
error: Content is protected !!