KRALENDIJK – Despues di hopi kombersashon, nos a logra ku Hulanda a aseptá pa Boneiru habri porta pa turistanan for di Merka entrante febrüari 2021, diputado Hennyson Thielman a bisa. “Nos a logra pa e buelonan yega Boneiru, sinembargo loke a sosodé ku e proseso a stanka, debí ku tin sierto medida ku ta stroba e turista pa yega Boneiru. Esaki entre otro e ‘tèst antigéniko’, ku nan ta pidi awor denter di 4 ora i esaki a mustra di ta e loke a wanta e proseso pa turista for di Merka pa Boneiru.

Biaheronan for di paisnan di riesgo haltu ku kier biaha pa Boneiru, mester hasi un tèst antigéniko 4 ora promé ku salida pa Boneiru. E tèst antigéniko ta obligatorio pa biaheronan for di paisnan di riesgo haltu manera Merka i Canada. United Airlines, Delta i American Airlines a kanselá nan vuelo i a plania esaki awor pa mart 2021.

Banda di e tèst antigéniko, biaheronan mester laga hasi e tèst di PCR pa mas tardá 72 ora promé ku yegada na Boneiru. Tambe biaheronan mester yena un deklarashon di salú 48 ora promé ku nan salida pa Boneiru. Huntu ku e dos test nan aki biaheronan mester yena pa mas tardá 72 ora i no mas lat ku 48 ora promé ku salida un deklarashon di salú di departamento di Salubridat Públiko.

Awor ta wak kon por kambia esaki pa tòg e turista merikano yega Boneiru. Meskos a hasi esfuerso pa e turista di Hulanda yega Boneiru, sinembargo debí na e situashon na Hulanda i avisonan negativo pa bia pafó di Hulanda, tambe tin impakto riba e hendenan ku ta bin for di Hulanda pa Boneiru. Nos ta hasi esfuerso pa logra trese turista Boneiru, sinembargo tur kaminda tin medida fuerte pa tene e hende di no biaha pa eksterior. Nos ta sigui buska manera pa trese turista i èkstra sosten finansiero pa e kompanianan ku ta aktivo. Otro kos, aparte di Covid-19 tin e variante, loke ta pone mas medida nobo, esaki pa prevení ku e ta drenta den e pais”, diputado Hennyson Thielman a bisa.        

Share This
error: Content is protected !!