KRALENDIJK – Diferente personal di toren, esta kontroladónan aéreo, no por presentá na trabou debí ku nan ta den karentena pa 10 dia, loke a pone ku Bonaire International Airport (BIA) a adaptá orario di aeropuerto. BIA a hañ’é obligá pa adaptá ora di servisio relashoná ku e situashon. Esaki ta loke Radio Live99FM a haña konfirmashon di dje. 

Por lo ménos 4 kontroladó aéreo, riba instrukshon di Salubridat Públiko, ta den karentena. Esaki debí ku nan tabata den kontakto ku hendenan infektá ku Coronavírùs. E empleadonan ku no por ta presente na trabou, sigur tin un impakto ku ta pone ku no por kubri e oranan ku Aeropuerto Flamingo mester, pa e ta funshoná optimal segun skema. E no ta bon pa e personal funshoná ku 4 hende ménos, loke no ta duna sufisiente tempu pa deskansá i regresá trabou. BIA huntu ku Dutch Caribbean Air Navigation Service Provider (DC-ANSP), e instansia enkargá ku kontròl di tráfiko aéreo, a implementá kambio den e orario di maneho operashonal pa e próksimo 10 dia. Esaki a drenta inmediatamente na vigor.  E orario nobo di BIA durante dianan di siman aktualmente ta; 07.30 di mainta te 7or di anochi. Durante fin di siman 6 i 7 di febrüari, orario di Aeropuerto Flamingo ta; 11’or di mainta te 7or di anochi. Di e manera aki a ahustá e orario i e ta hasi posibel pa DC-ANSP kubri e demanda ku e kantidat disponibel di kontroladónan aéreo i manehá kansansio di e trahadónan di kontròl aéreo na un nivel aseptabel. 

Share This
error: Content is protected !!