KRALENDIJK – 45 aña e tabata un di e aktividatnan ekonómiko mas grandi aki na Boneiru banda di Cargill, turismo i serktor di servisio (banko, offschore. ets.) Sankshonnan merikano kontra Venezuela sostené pa Ulanda a pone ku BOPEC awe no ta den e estado mas pa kumpli ku su obligashonnan finansiero entre otro pa ku su trahadónan i ya for di basta tempu tur operashon na e terminal a paralisá.

A bin aserka ku e estado di mantenshon di e terminal tabata i ta di tal gravedat ku ministerionan di Ulanda enkargá ku seguridat pa medio-ambiente i hende a disidí di para tur operashon te ora logra pone e terminal na e nivel ku internashonalmente ta rekerí.

E dos faktornan aki huntu a duna indikashon kla i raspá ku si no bin un solushon struktural, BOPEC su dianan lo ta kontá. USIBO komo e organisashon madre riba petishon di e dos sindikatonan BPWU i FEDEBON a hasi tur esfuerso humanamente pa enbolbí tur e stakeholdersnan ku por tin influensha riba e eksistensia di e terminal pa nan wak den e mesun direkshon, esta kon pa tene BOPEC habrí den un forma sano i sigur pa asina e kontribushon sosial-ekonómiko-finansiero di e terminal ta salbaguardiá. E vishon di USIBO tabata i ketu bai ta ku BOPEC habrí entre otro lo

1. Krea trabou den e fase di rekonstrukshon pa sigur un 300 pa 400 hende di fishi, miéntras ku den e fase operashonal esaki lo por ta alredcedor di 125 trahadó permanente mas tur e kuponan di trabou indirekto ku lo keda kreá pa kompanianan ku lo hasi negoshi ku BOPEC. Un solushon stuktural pues riba término largu i ku sigur nos lo tabatin mester den e situashon di krisis den e industria di turismo ku COVID-19 a okashoná. E spin-off tambe lo tabata bisto den tur sektor.

2. Entrada supstansial pa tantu kaha di Boneiru komo Den Haag pa loke ta trata e diferente impuestonan, pero tambe pago pa erfpagt, pago pa uso di e wafnan, pago pa loodsoot, pa toubot ets.. Aki USIBO a proponé pa entrodusí un sorto di impuesto pa kada barí ku drenta Boneiru, un fee pa warda e produkto i un fee ora e kumpradó saké for di Boneiru. Nos a kalkulá un entrada supstanshal mirando e kapasidat di almasená di e terminal.

3. BOPEC den serkania di Contour Global lo por a nifiká un bahada supstansial pa preis e HFO ku mester pa produsí koriente ya ku e tanki lo tabata na un distansia

di 1 km i lo por a transportá esaki muchu mas barata ku aktualmente ta e kaso ku mester kore e produkto for di aeropuerto te Contour Global ku tur e konsekuensianan. Bahada di kosto di produkshon di awa i koriente lo tin un efekto positivo riba kosto di bida en general i lo tabata un pida esfuerso propio pa nos kontrolá i manehá pobresa.

4. Un investigashon ku si por a usa e sludge pa traha kaminda lo por a nifiká ku por konstruí i mantené nos kareteranan den un estado salú.

5. Bario di Rincon lo a haña un bida ku aktividatnan ekonómiko, mas sosialmente lo por a adoptá e skol di Rincon, e kanchanan deportivo, miéntras ku nos a proponé konstrukshon di un theater den e bario kaminda lo por a eksponé na un manera komersial nos kultura i tradishonnan den nan pleno magnitut.

Mirando tur e bentahanan básiko aki i sigur mas bentaha, USIBO a keda sostené den su lucha primeramente pa gezaghèber i Bestuurscollege, pero tambe pa partnernan di e Dialogo Sentral kual ta sektor privá aki na Boneiru. Tambe nos a haña sosten moral di parlamentarionan den Tweede Kamer i di parti di Refineria Isla di Kòrsou. Tur ku e mesun meta esta tene Bopec habrí.

I pa kulminá e lucha aki dia 17 di yüli 2020 nos a organisá un manifestashon popular pasífiko pa hala atenshon di henter komunidat di Boneiru pero tambe di mundo kompleto di e tragedia ku BOPEC i su trahadónan tabata enfrentando i nos a traha un MANIFESTO firmá pa USIBO, BPWU i FEDEBON den kual nos a deliñá e strategia ku HUNTU nos lo mester a kana pa tene Bopec Habri. Nos a simbolisá esaki ku un petishon hasí na gezaghèber pa un hobensita di 9 aña ku a pidi atenshon pa nan futuro kual pa gran parti por ta dependé di kontinuashon di operashon di BOPEC.

Awe mas ku 80 tata i mama di famia mester biba ku e realidat ku nan a traha henter luna di yanüari pero ku ora dia di kobra a yega, nan a risibi e notisia ku no tin sèn pa paga e salario, miéntras ku no a duna ningun klase di garantia ku lo bin sèn tampoko pa sigui paga salario di e trahadonan den e lunanan benidero. Pregunta ku USIBO tin ta ku si BOPEC ta kumpli ku otro kompromisonan finansiero, manera primanan di seguro, prima di penshun, kontribushon den fondo di spar, erfpagt, impuestonan ets i ki konsekuensia esakinan tin. Nos no por ni ke sinta nan banda wak e sufrimentu aki. Pesei USIBO a sigu traha tras di kòrtina sabiendo ku e dia aki lo yega, maske tabatin forsanan ku a instigá trahadó pa kere den webu di gai. Nos lo no laga trahadó na kaya i lo hasi tur esfuerso pa duna nan e asistensia ku nan lo mester.

Share This
error: Content is protected !!