KRALENDIJK – Hefe di sentro laboral ‘Plenchi di Trabou’ Susan Willems, a papia na Radio Live 99.9 FM, pa informá komunidat di e servisio nobo pa Boneiru. “Hopi hende ta puntra kiko ‘Plenchi di Trabou’ ta para pe. Denter di Plenchi di Trabou, Entidat Públiko Boneiru (OLB) i Gobièrnu di Reino ta uni forsa pa logra oportunidatnan máksimo di empleo pa residentenan di Boneiru. 2018 a firma un akuerdo di gobernashon i den esaki a palabrá pa riba e merkado laboral, ku ta bai hinka esaki den un otro bachi. Den pasado tabata traha huntu ku OLB i SZW. Semper e servisio di buskadónan di trabou tabata sosodé na OLB. E suidadano tabatin ku pasa hopi kaminda pa e buska trabou. Awor nos ke hasi ku e hende por bai un kaminda, un lokèt i haña tur informashon. Loke e mester nos ta wak unda tin posibilidat p’e bai e kaminda deseá. A tuma poko tempu pa nos a investigá kiko tabatin i kiko ‘Plenchi di Trabou’ ta bai ofresé i awor e ta un realidat. 

Mediashon laboral ta un tarea di OLB i otorgamentu di ònderstant i pèrmit di trabou ta un tarea di unidat SZW di RCN. Ku un koperashon mas estrecho, por mehorá servisio pa esnan ku ta buska trabou i e dunadónan di trabou, i eliminá nesesidat di bishitá diferente bali.

Loke ta hopi bunita; promé ku a yega na e palabrashon den bestuursakkoort, Reino Hulandes i gobièrnu lokal a sinta papia, kon nos por hasi di Boneiru, un Boneiru duradero. Diferente programa a keda palabrá. Esei ta e forsa di Plenchi di Trabou, ku e ta basá riba 2 organisashon eksistente i for di e posishonnan aki, huntu ta apoyá pa e persona ku ta buskando trabou.    

Hopi a kana huntu ku nos pa wak kua dia nos ta habri. 18 di yanüari 2021 nos a kuminsá ofisial. Boneiru tabata kla pa yegada di ‘Plenchi di Trabou’. Nos tin hopi hende entre otro esnan ku a pèrdè trabou debí na CoViD-19 . Tin trabou na Boneiru. Diferente kompania ta aserka nos buskando hende pa traha. Ku trabou e hende por kombatí pobresa. Tur hende ku no tin trabou por aserka nos libramente pa haña yudansa di un trabou. Ta importante pa presentá na nos ofisina ku nan sédula i un CV. ‘Plenchi di Trabou’ ta situá na Kaya L.D. Gerharts, kaminda ántes Giro Bank tabata ubiká. E ora di servisio ta 8’or pa 5’or di atardi, i ta sera mèrdia entre 12’or pa 1’or. Por presentá i drenta den kontakto ku nos, tambe pa medio di website òf email. www.plenchiditrabou.cominfo@plenchiditrabou.com òf 7158346”, Susan Willems a bisa.

 

Share This
error: Content is protected !!