KRALENDIJK – Djasabra anochi, alrededor di 10:10 notifikashon a drenta na warda di polis di un aksidente di tráfiko ku herido ku a kaba tuma lugá na Kaya Caribe den e bario di Nort’i Saliña. Na yega di e promé unidat na e sitio, a bin konstatá ku tabata tin un bròmer na suela riba kaminda i 2 personá ku ta heridá i tabata keha di doló. Mesora a manda pidi 2 ambulans pa presentá na e sitio mirando e heridonan. For di un investigashon preliminar ku outoridatnan a hasi na e sitio, por a komprondé di testigunan ku un djip Suzuki Samurai koló kòrá moviendo direkshon nort kier a kita na su man robes pa lora drenta Kaya Oneida. E shofùr a indiká esaki ku su regtenwèizer. Nèt na e momentu ei, e bròmer kolo kòrá tabata pasando un vehíkulo riba Kaya Caribe riba su banda kontrali i no a tuma nota na tempu ku e djip a lora su dilanti. Shofùr di e bròmer a purba evitá e choke pero a bai dal den bùmper patras di e djip dor di kua e shofùr i e pasahero di e bròmer a kai. E víktimanan tabata tin rasku na nan kurpa i na kabes. No por a enkontrá niun hèlm na e sitio ku ta indiká ku e víktimanan riba e bròmer no tabata tin un hèlm bistí. Ku ambulans a transportá tur dos herido pa hòspital pa tratamentu médiko. CRS tambe tabata na e sitio pa saka pòtrèt di e senario i atendé asuntunan di seguro. E kaya a keda será algun ratu pa investigashon.

Share This
error: Content is protected !!