KRALENDIJK – Habitantenan di Boneiru ku derecho di vota, por vota den elekshon pa Tweede Kamer 17 di mart binidero. Esaki ta loke suidadano Arthur Sealy ta skirbi den un karta dirigí na prensa. “Na Hulanda pa motibu di Covid-19 por kuminsá vota for di 15 di mart. Bo ta liber pa bai vota meskos ku bo ta liber pa tuma e bakuna. Tur hende tin motibu pa hasi i keda sin hasi. Ami tin motibu pa tuma e bakuna, pa motibu ku mi ta den grupo di riesgo, mi no ta kere den teoria di kòmplòt i Boneiru no por keda será ku tur konsekuensia ekonómiko. Pa elekshon tambe mi ta bai vota. Mi a hasi un análisis i a yega na e konklushon ku e partidonan: D66 (727), CDA (413), VVD (300) ku a haña 1440 voto na Boneiru na 2017, no a kontribuí na adelanto di Boneiru manera a spera. Nos no ta kontentu ku; e manera kon a regla tarifanan pa awa i koriente, ku e sistema di klasifikashon di e barionan relashoná ku balor di bibienda, ku e parti sosial ku no ta reglá na satisfakshon di habitantenan di Boneiru i kareteranan. E partido mas chikitu den gabinete ku sí a hasi hopi pa Boneiru ta netamente e mandatarionan di Christen Unie (CU). Nan ta Paul Blokhuis ku ta sekretario di estado pa salubridat, bienestar i deporte. Arie Slob minister pa enseñansa primario, sekundario i MBO i Carola Schouten pa agrikultura. Mi ta mira ku riba e terenonan ei tin personanan na Boneiru ku ta manehá e terenonan ei ku sabiduria, dedikashon i independiente na bienestar di e habitantenan di Boneiru. Mi ta vota pa kandidato number dos di Christen Unie, ku ta Carola Schouten”, Arthur Sealy a bisa. 

Share This
error: Content is protected !!