KRALENDIJK – Bario Tera Kòrá, ta den un situashon insoportabel i ta asotá pa holó di huma tóksiko práktikamente tur dia. Esaki ta loke algun habitante a remarká i a pidi pa publik’é pa esnan konserní tuma akshon, pa stòp e asuntu menshoná. Radio Live 99.9 FM a komprondé ku ya pa un temporada, un òf mas persona ta kima kos den nan kurá di kas, loke ta kousa un holó teribel pa e hendenan bibá den e área pabou den Bario Tera Kòrá. No ta algu ku ta bini for di e bario òf kunukunan pariba di Tera Kòrá, sinembargo ta hende di den e bario mes parti pariba ta kousa molèster di huma. Tantu brantwer, polis i Toezicht en Handhaving ta na altura di e situashon. Nos a yama brantwer, nan a bini i sinti kon e holó ta penetrá te den mi baño. Nos kas ta ful será. No por habri porta òf bentana di kas. Asina mes e holó ta penetrá. Pa motibu ku no sa na unda tin kandela, brantwer ta bisa ku nan no por hasi nada i pa yama polis. A yama polis i na vários okashon nan a bini i hasi anotashon di e asuntu. Despues nan a bisa nos pa yama e departamentu di Toezicht en Handhaving di OLB. Nan tambe a bini pero ta bisa nos yama polis. Pues di kashi pa muraya i muraya pa kashi mientras niun hende ta hasi nada pa aktua. Nos salú ta sigui bai atras, e habitantenan ta bisa sklamando. Radio Live 99.9 FM a drenta den kontakto ku bosero di polis i BKCN.

Bosero di KPCN den un reakshon kòrtiku a konfirmá ku polis ta na altura i tin diferente notifikashon a yega di drenta di e situashon fastioso aki. Tambe ta mira ku e departamentu di T&H a wòrdu pone na altura.

Miéntras tantu diparti di Brantwer den un reakshon pa Live99.9 FM, nan ta bisa lo siguiente: “BKCN bèrdat a haña e informashon tokante huma den Bario Tera Kòrá. Brantwer di su banda a atendé e situashon i a bai buska pa sa di unda e huma ta bini i a midi kon dañino e ta. No a konstatá ku ta trata di algu kontagioso, pues no tin peliger pa salú di hende debí na e huma. Den kunuku patras di Bario Tera Kòrá tin kompania ku ta kima palu pa karbon, loke nan ta hasi algun bia durante un aña. BKCN no por a konstatá otro fuente, sino solamente esun ku ta kima palu pa karbon. Esaki no ta forma niun peliger pa kandela den e área ku e keho ta bini. BKCN ta vigilá tur situashon di kandela pa nan no ta pafó di e área di riesgo, esaki den kolaborashon ku OLB. Momentu ku tin un situashon kaminda hende tin problema ku holó dudoso, semper Brantwer ta atento pa midi i wak si tin kosnan kontagioso ku ta manda huma i holó peligroso pa salú di hende. Den e kaso aki por bisa ku esei no ta e kaso”, BKCN a bisa.

Ta spera ku algu ta sosodé na e situashon pa asina finalisá e asuntu di kandela i huma ku ta malu pa salú di hende ku ketubai habitantenan di bario Tera Kòrá ta konfrontá kuné.

Share This
error: Content is protected !!