KRALENDIJK – Despues ku Kolegio Supervishon Finansiero (CFT) a bai di akuerdo ku e kambionan proponé den e promé kambio di presupuesto pa 2021, Kolegio Ehekutivo a entreg’é na Konseho Insular. Resientemente CFT a manda su konseho pa Kolegio Ehekutivo, ku a inkorporá esaki den e kambionan presentá na Konseho Insular. Un di e kondishonnan pa CFT a bai di akuerdo ku e kambionan proponé; pa mas tarda 1 di febrüari CFT mester ta den poseshon di e rapòrt di e investigashon tokante e presupuesto di personal. CFT a duna di konosé ku sekretario di Estado di BZK, a pidi Kolegio Ehekutivo pa finalisá e investigashon eksterno tokante eksaktitut integridat di e presupuesto di personal pa mas tarda 1 di yanüari 2021 i pa entrega esaki na CFT. Ta trata di e mes rapòrt di investigashon tokante presupuesto di personal, ku Deloitte ta hasi i ta keda entregá pa mas tarda 1 di febrüari 2021. CFT ta konsehá pa ta kompletu, pa konkluí e splikashon di kon ta bai kubri e kontribushon propio di gobièrnu di Boneiru tambe den e kambio di presupuesto. Kolegio Ehekutivo ta bisa di a tene su mes na e kontribushonnan propio den e proyekto di medidanan di protekshon kontra kandela pa aeropuerto, dor di ya a kontribuí ku un suma di 1.900.000 dòler. Oil Trading Boneiru a duna di konosé ku e tin mester di 539.000 dòler adishonal pa finalisá e proyekto di protekshon kontra kandela. Kolegio Ehekutivo ta kompartí opinion di CFT ku mester añadí un reportahe tokante mehorashon den e maneho finansiero den e splikashon stándart di e reportahenan di ehekushon, kuminsando for di ehekushon 2021. 

Share This
error: Content is protected !!