KRALENDIJK – Radio Live 99.9 FM pa medio di facebook a hasi posibel pa hende por a vota loke nan ta pensa relashoná ku bakunashon. Esta nan por a bisa sea si òf nò ku nan ta bai tuma e bakuna. 449 a bisa nò i 189 a bisa si. Meta di esaki ta pa wak si komunidat ta di akuerdo pa tuma e bakuna.  

Diputado Nina den Heyer i Joey van Slobbe kordinadó di e programa di bakunashon a papia den e programa di ‘Brunch 99’, tokante reakshon ku Radio Live 99.9FM a hasi relashoná ku e bakunashon.   

“Hende ta bisa no ta tuma e bakuna, pasobra e otro a bisa asina. No tin informashon korekto. E ta mes kos ku un bakuna normal. Tin mucha ta bira un tiki grip, sinembargo nada partikular. Asina e ta i ta bon pa no tuma informashon for di fuente nan ku no ta informá korekto entre otro riba facebook. Ami tabata deseá pa pas’é promé, sinembargo tin gruponan ku tin prioridat i mester tene kuenta ku e maneho. Bo ta duda pa tuma e bakuna;puntra bo dòkter di kas si tur kos ta bon ku bo salú pa bo tuma e angua ”, diputado Nina den Heyer a bisa.   

Joey van Slobbe a menshoná ku nan ta dunando informashon pa medio di diferente medio di komunikashon. “Poko poko nos ta informá riba diferente fuente pa e informashon yega serka tur hende. Ta informashon risibí di RIVM. E bakuna ta drenta bo kurpa i e ta eliminá e vírùs. E chèns pa un hende haña problema ku e vírùs ta mínimo. Pfizer ta hopi bon. Tin mas bakuna  sinembargo esun menshoná ta hopi bon riba merkado aktual. Zùster i hendenan di edat ta bai haña promé e Pfizer. 8000 pfizer ta bin pa Boneiru. Despues di promé angua, ta pasa e di dos 6 siman despues. Siguiente grupo ta di 18 pa 60 aña pa risibí e bakuna. Tin posibilidat ku sierto hende por risibí ‘side efect’ di e bakuna; manera kansansio, doló di spir òf steif kaminda pasa e hende angua. Pfizer no ta kita bida di hende. Si hende a pas’é i a fayesé, ta pasobra e hende a muri di algu otro. No tin di aber ku e bakuna kontra Coronavírùs. Tin hende ku ta haña sierto alergia, esta ku ya nan a haña e promé bakuna i nan a haña un sentimentu i no ta pasa esun di 2. Si e situashon ta fuerte, tin ku wak kiko ta sigui pa e persona. Esaki ta sosodé masha poko, loke ya nan a hasi den diferente prueba. Pronto ta bai kuminsá informá e hende ku ta na turno pa pasa e angua. Otro siman e bakunanan ta yega Boneiru. 22 di febrüari ta pasa e promé grupo di hende e bakuna. 1 di mart ta kuminsá ku bakunashon pa e grupo di 60 plùs. No ta bai meskla e bakuna di un marka pa otro”, Joey van Slobbe a bisa.  

Share This
error: Content is protected !!