KRALENDIJK – E menasa di retiru masal di hende for di BOPEC tin frakshon di Union Patriotico Boneriano (UPB) den Konseho Insular preokupá. Den un karta dirigí na presidente di Kolegio Ehekutivo, gezaghèber Edison Rijna, presidente di e frakshon di UPB, Dra. Esther Bernabela, ta trese e preokupashon dilanti i ta hasi diferente pregunta relashoná ku e situashon preokupante na e kompania di transbordo di zeta. Segun e frakshon, den e momentunan tristu i desesperante di un retiro masal premirá i ku pèrdida di kuponan di trabou ta bisto, frakshon di partido UPB den konseho insular, ta hasi diferente pregunta pa kuestioná maneho i posishon di gobièrnu. E frakshon ta deseá un kontesta konforme Art. 45 di reglamentu di Ordu, den e próksimo reunion di Konseho Insular. 

E frakshon ta deseá pa tende kua tabata e promé dia ku Kolegio Ehekutivo a haña indikashon ku retiro tabata inevitabel na BOPEC. Meskos UPB ta desea pa sa kua medida gobièrnu di Boneiru a tuma pa evitá òf suavisá e retiro i si a tuma akshon òf si tabatin interkambio konkreto ku Refineria di Kòrsou (RdK) i otro akreedornan pa suavisá e medidanan kontra BOPEC. E frakshon den Konseho Insular ke mas di e medidanan ku Hulanda c.q. ministerio di Asuntunan Interno i Relashon di Reino (BZK) a tuma relashoná ku e instalashon nan di BOPEC. Tin indikashon ku ta pone BOPEC na findishi i ki posibilidat tin pa gobièrnu hulandes kumpra e instalashonnan di BOPEC. Un di e problemanan,segun UPB ta, mester a tuma lugá un transakshon petrolero pa paga debe i salarionan, sinembargo esaki no por ta tuma lugá, debí na e estado di e ‘jetty’nan. E frakshon ke sa kiko tin bèrdat den esaki i si lo bai kùr e ‘jetty’nan af. Mirando ku e kompania ta establesé riba tereno di èrfpagt di gobièrnu di Boneiru, UPB ta deseá pa tende kiko ta e implikashon na momentu ku e planta i e instalashonnan no ta aktivo mas. 

E frakshon ta pidi pa haña kontesta riba e preguntanan den e próksimo reunion di Konseho Insular. En bista ku tin un grupo di trabou (stuurgroep) ku ta atendé asuntunan di BOPEC, UPB ta pidi pa e ‘stuurgroep’ ta presente den e reunion di e Komishon Fiho, pa duna klaridat riba e desaroyonan rònt di BOPEC. E frakshon ta sigui bisa ku den e pandemia di CoViD-19 ta asuntu di máksimo prioridat, sinembargo UPB ta haña e situashon di BOPEC i e konsekuensianan ku esaki ta trese kuné di tal índole, ku ta nesesario pa atendé e asuntu akí ku diligensia, i ku Kolegio Ehekutivo kompletu.

Share This
error: Content is protected !!