KRALENDIJK – Farándula di Boneiru i moveshon den e mundu aki ta sigui kayente no opstante e pandemia di COVID-19 tin práktikamente tur kos wantá. Despues di basta spekulashon na Boneiru i Kòrsou, awor e ta konfirmá ku Michelangelo ‘MJ’ Martina, a yega pa bin establesé su mes aki na Boneiru ku su famia kuminsando un etapa nobo di bida. Algun dia pasá, agrupashon musikal ‘One Flavaz’ na Kòrsou a despedí di MJ ku sigur pa 2 aña a forma parti di e grupo i tabata tin e piesa ‘Tene mi man’ riba su nòmber ku a dal pega duru. Radio Live 99.9 FM a haña un yamada anónimo awe mainta lat pa presentá na aeropuerto Flamingo, paso avion a kaba di aterisá ku un konosido kantante i ku tin 2 persona ku ta forma parti di maneho di e agrupashon musikal ‘Fenty Music’ a bin busk’é. Na yegada di nos reportero na Aeropuerto, nos a bin dal den Janou Troeman i Faysel Francisco. Promé pregunta tabata; si Michelangelo MJ Martina, tin algu di aber ku agrupashon musikal, sinembargo nan a pone énfasis ku ta trata di simplemente un ruman di nan ku a bin for di Kòrsou (referiendo na un bon amigu). Michelangelo MJ, a bisa ku el a bin Boneiru pa biba i el a pidi esnan ariba menshoná pa busk’é na aeropuerto, pasobra e konosé nan bon. “Mi ta bai tuma mi tempu pa klimatisá na Boneiru i meskos mi amigunan musikal tambe a bisami. Momentu mi disidí pa sigui ku algu musikal na Boneiru, lo mi no laga mi rumannan na kaya”, Michelangelo a bisa. Pues ku esaki e ta menshoná ku poko palabra si e kuminsá ku kantamentu na Boneiru e lo ta forma parti di Fenty Music. Rumor ya ta sirkulá i ta 99% sigur ku Michelangelo MJ, ta bai forma parti di e frònt nobo di Fenty Music.

Manera konosí e grupo a pèrdè mas ku mitar di su músikonan. Kombiná ku e situashon di CoViD-19 e grupo a hala tras un momentu pa evaluá, sinembargo Radio Live 99.9 FM a komprondé di su fuentenan, ku awe (pa kasualidat ku Michelangelo MJ a yega Boneiru) integrantenan di e grupo ta reuní pa papia riba kontinuashon. Nan a menshoná tambe ku denter di algun dia nan ta bai presentá plannan ku tin relashoná ku agrupashon musikal ‘Fenty Music’. “Loke mi por bisa ta ku mi rumannan Janou Troeman i Faysel Francisco tin bon konosementu musikal ku hopi eksperensia na Kòrsou den pasado. Fenty Music ta un bon banda, no tin duda”, Michelangelo MJ a bisa na aeropuerto den un kombersashon kòrtiku.  

Un kos ta sigur Fenty Music lo bai ta hopi mas mihó di loke e tabata! Tin hopi plan i mas despues nos di Fenty Music ta informá públikamente tur kos di e agrupashon musikal, tabata loke a keda menshoná e momentu di yegada di Michelangelo MJ, na Boneiru, kende ta un bon kantante i tabata forma parti di agrupashon musikal ‘One Flavaz’ na Kòrsou. No mester lubida ku Ron Martis, eks kantante di agrupashon musikal ‘Buleria’ pa algun luna kaba ta establesé na Boneiru. Kaminda tin huma, ei nan ta bisa ku mester tin kandela. Te aki!

Share This
error: Content is protected !!