KRALENDIJK – USIBO despues di un reunion bi-partit ku gobièrnu ta trese dilanti den un komunikado ku mirando e menasa di tantu COVID-19 komo e menasa na BOPEC, pero tambe e desaroyo riba merkado, partidonan a sinti mas ku nunka, ku a yega e momentu pa krea un fondo di desempleo pa asina temporalmente lo por yuda esnan ku pèrdè trabou. Pareu ku esei tin konsenso ku e aktual mínimo sosial mester move i keda oumentá pa mesora krea e espasio pa stipulá un sueldo mínimo real for di kual lo por derivá e “uitkeringennan” manera penshun di behes i ònderstant. Tur esaki kompañá ku maneho di apoyo riba diferente tereno, manera entre otro akohida di mucha, kinderbijslag, supsidio di hür en general, kubrimentu di gastunan di awa i koriente. Den un palabra mehorá supstansial e forsa di kompra.

Finalmente partidonan a akordá ku lo tene kada kuartal e tipo di reunion bipartit aki pa asina sigui vigilá tur desaroyo ku tin di haber ku nos merkado laboral. Interesante ta ku a palabrá ku lo bai papia mas profundo riba fleksibilisashon di trabou pa loke ta kantidat di ora di trabou pa siman, pero tambe lo papia riba kambionan di orario tradishonal i ki alternativa por bin pa esaki pa asina oumentá produktividat.

Un punto importante ta bon práktika di e dunadó di trabou ku den hopi kaso ta laga hopi di deseá. Importante tambe ta ku e klase trahadó ta kita e miedo ku ta reina i ta afiliá su mes na un sindikato kaminda e por bai na denunsiá e mal práktikanan i asina por tuma medida pa remediá situashonnan indeseá. Algun palabrashon konkreto tabata ku gobièrnu lo atendé ku e asuntu di uitzendbureau manera e lei “Wet op het ter beschikking stellen van arbeidskrachten” ta preskribí i lo manda un atvertensia pa tur esnan ku ta usa e konstrukshon aki pa realisá ku nan mester di pèrmit pa operá. Lo konsiderá pa e servisio di supervishon i mantenshon funshoná riba e tereno aki, miéntras ku lo kontemplá pa lanta un “task force” kombiná ku departamentu sosial i di labor pa supervisá i mantené tur lei- i reglanan ku nos lei di labor 2000 ta preskribí i lo aktua kontra violashon di esakinan. USIBO a trese dilanti ku mester aktua awor pa evitá ku e situashon riba e merkado laboral ta sali for di man i ta bira inkontrolabel.

Share This
error: Content is protected !!