KRALENDIJK – Sindikato FEDEBON a organisá un enkuentro ku prensa djaluna atardi, relashoná ku e situashon na BOPEC. USIBO tambe tabata na mesa pa huntu ku FEDEBON pa papia loke ta sosodé na BOPEC. Gerold Bernabela, presidente di FEDEBON a bisa ku ta na su lugá pa informá tokante e situashon. “Nos a sinta na mesa papia i purba tur manera pa tene e asuntu aki poko kouteloso, esaki debí ku tin un otro grupo na BOPEC ku no ta den e mes un pensamentu ku nos grupo. Nos no ta tilda otro i p’esei nos a purba tòg pa papia dialogá i yega na un pensamentu. Pa bai bèk for di prinsipio, nos a menshoná pa nos por yega na palabrashonnan, evitá ku mester bai atendé ku referèndem. Trahadónan a skohe FEDEBON pa atendé ku gerente di BOPEC. Nos a papia ku e direktor Fabiola, e momentu aya, sinembargo nada no a bira algu konkreto. Despues a bin Coredor i nos tabata manda karta i e tabata bisa ku e no a risibí nada. E situashon tabata hopi difísil pa tende algu konkreto.  

Sindikato BPWU 

Nos a palabrá ku BPWU kon nos ta bai huntu na mesa sinembargo nos a haña sa loke no por a evitá, ku BPWU tabata bai reunion ku gerente. Asina kos a sigui i a bin na e idea pa un manifestashon i a entregá un karta na gezaghèber di Boneiru. Hopi trahadó a presentá. Despues nos a plania un di 2 enkuentro na porta di BOPEC. Aki kos no a kana muchu bon. A konstatá ku no tabatin ekipo pa paga kandela riba tereno di BOPEC. Tabatin trahadó ku tabata deseá pa sigui traha i otronan no. Un ‘shop steward ‘a haña karta di retiro i despues a gana kaso den korte kontra BOPEC, esaki a sosodé na 2 okashon. Gerente di BOPEC no sa nos leinan i ta krea problema entre trahadónan. Echo ta ku ta bai yega un kaminda ku no tin sèn pa paga niun trahadó. Tempu a pasa i no tin un bista ki dia sèn ta bai yega pa paga trahadónan. E forma ku ta bisa ku ta bai manda sèn pa trahadónan no ta parse ku ta algu ku ta bira realidat. Mester por sinta na mesa papia i wak kon ta sigui òf kiko ta bai sosodé. E trahadó ta sufriendo. E kos aki no ta hustu. Hopi frustrashon tin bou di trahadónan. Ta tira falta riba gobièrnu di Boneiru i esun di Hulanda, sinembargo ta BOPEC a faya den entre otro mantenshon di e lugá. Hulanda a disidí di protehá su mes i pone tur produkto den 2 tanki. A brua produkto den otro, loke no ta sirbi mas. Un situashon hopi kompliká ta reina rondó di e problema di BOPEC. No sa si ta bai paga penshun i seguro. Nos no ta mira ku ta bai tin solushon”, Gerold Bernabela presidente di FEDEBON a bisa.

Share This
error: Content is protected !!