KRALENDIJK – Gerold Bernabela, presidente di sindikato FEDEBON a bisa ku trahadónan di BOPEC ta bai entamá un kaso kontra nan doño di trabou. Esaki pa por pone beslag na momentu ku kualkier sèn subi kuenta di BOPEC pa trahadónan haña loke nan tin derecho riba dje.  

“Nos a hasi hopi intento pa sinta na mesa, pero te dia di awe niun kontesta. Nos a studia i analisá kiko mester hasi i a haña konseho di otronan. No a keda nada mas pa hasi algu pa e pago di salario, loke e trahadónan tin derecho riba dje. Nos no por sigui papia, sinembargo mester kuminsá atendé pa ora un sèn drenta riba kuenta di BOPEC, tin un papel legal pa por pone beslag riba e sèn pa e trahadó haña su salario. Ya nos a papia ku nos abogado pa e tuma nota di loke mester sosodé i analisá henter e situashon. Pues trahadónan ta bai entamá un kaso kontra nan doño di trabou ku ta BOPEC. Esaki pa garantisá nan sueldo. Mester hasié, ya si sèn drenta òf kos drecha i si kita solamente algun trahadó i kontinuá ku otronan, sin e sentensia di hues, e trahadó no por reklamá nada. Nos a instruí pa bai un ‘kort geding’. Ta trata di dos komponente ku ta bashí preimi i nan salario ku nan no a haña. Esei ta nos strategia i tin rumor ta sirkulá ku gerensia di BOPEC a tende loke ta bai pasa i ta kla pa deklará bankarota pa e empresa, sinembargo esei nos no ta sigur. Asuntu di bankarota nos tin ku bai studia untiki mas afondo, pero pa awor aki nos kier garantisá ku si un dia kualke sèn subi kuenta di BOPEC, ku por pone beslag ariba pa e trahadó haña su sèn ku el a traha pe”, Gerold Bernabela a bisa.

Share This
error: Content is protected !!