KRALENDIJK – Awe djaweps 11 di febrüari den oranan di mainta, reporteronan di Radio Live99.9 FM sigur na dos okashon den ménos ku 2 ora a kapta situashonnan no tolerabel den tráfiko di shofùrnan ku komportashon iresponsabel. Hopi usario di tráfiko no ta respetá otro i tampoko ta kore konforme regla di tráfiko. Pa kasualidat, den tur dos kaso tabata trata di Hulandes Oropeo. Awe mainta alrededor di 11’or un reportero a topa ku un hòmber riba un skuter di hür ku a drenta Kaya Libertador Simon Bolivar for di direkshon prohibí na altura di Lucas Bar. A para e hòmber aki i indiká na dje ku e direkshon ku e ta kore ku su skuter ta prohibí (verboden). E hòmber a neglishá i mustra ku e ta sigui kore den direkshon prohibí. No a dura 10 sekònde ku e hòmber tabata bentá na suela riba kaya pa motibu ku el a keda alkansá pa un vehíkulo den e mesun kaya ku di sorpresa a hañ’e ku e skuter su dilanti. E hòmber na dado momentu tabata intentá di subi e skuter i kore bai. Mesora a yama polis i CRS ku a yega rápidamente na e sitio pa atendé ku e situashon. E di 2 kaso tabata mas lat den oranan di mèrdia, un polis na sivil a aktua tremendo, mustrando un shofùr, ku e mester kore konforme regla di tráfiko. Loke a sosodé ta ku, 2 persona den un djip di hür, a drenta e kaya ku tin mei mei di e edifisionan di MCB Bank na Playa den direkshon prohibí. Nan mala suerte tabata; ku tabatin un polis na sivil, nèt tras di e djip, pues el a mira loke a sosodé. E djip a drenta den direkshon kontrario kaminda ya menshoná. Momentu ku e polis na sivil a baha for di su vehíkulo personal i indiká nan ku ta direkshon kontrali, un persona a baha for di e djip i a bai na e ATM di MCB. E shofùr di e djip, a bèk sali for di e kaya, bai dilanti i drenta Kaya Grandi direkshon kontrali bai para riba asera na altura di Kaya Kòrsou. Agente polisial Statia a baha for di su outo (sin ünifòrm di polis) i a splika e persona ku e mester bai stashoná otro kaminda. Mientrastantu tráfiko a pega debí na e shofùr iresponsabel. Ta notabel ku e polis mester a identifiká su mes, pa e shofùr di e djip a sigui su òrdu. Tremendo reakshon di e agente polisial na sivil. Un ehèmpel pa otro agentenan polisial ku mester reakshoná mesora ora enfrentá situashonnan no korekto den tráfiko ku mester aktua asta ora nan no ta riba patruya (na sivil pues). Ta notabel ku hopi turista i Hulandesnan Oropeo no ta respetá bòrchinan di tráfiko i ta kore di forma iresponsabel riba nos isla, hinkando otro usuarionan di tráfiko den peliger. Ta parse ku nos bòrchinan di tráfiko ta diferente òf tin otro nifikashon ku na otro Pais na mundu. Esaki ta sosodé spesialmente anochi i den fin di siman. 

Share This
error: Content is protected !!