KRALENDIJK – JICN a presentá un idea inovativo yamá ‘Speed date’, loke ta enserá ku ta buskando hende pa traha na e ‘Instituto Hudisial Hulanda Karibense’, konosí pa ‘JICN’. Ta trata di un inisiativa pa invitá hende pa solisitá riba e diferente oportunidat ku tin pa trabou na prizòn. Entre otro ta buskando hende pa e parti di seguridat (B-WA), P-W’er: bewaker riba tereno (esta ku kontakto direktamente ku e prezu). Z-BW’er: Tin 2 departamentu nobo ku a habri i ta buskando hende pa atendé ku e parti di menor di edat. Tin un otro mas ku tambe ta nobo ku ta e parti di traha ku persona nan ku problema mental i tin mester di hende pa ehersé e funshon. Dependé e departamentu, e ta eksihí un estudio ku bo mester tin pa por okupá e funshon. E parti seguridat B-WA ta rekerí mínimo un MBO-2, P-W’er: MBO-4, Z-BW’er: MBO4+, òf HBO. Banda di e loke ta eksigí, momentu ku un persona solisitá, e ta hasi un estudio básiko spesial dirigí riba e trabou den prizòn.

E idea tras di ‘Speed Date’ ta; ku e hende no mester bai skirbi karta di solisitut, sinembargo simplemente mester mèldu pa medio di meil (tom.libiana@jicnbonaire.nl òf suyen.koffy@jicnbonaire.nl). E informashonnan rekerí den e meil aki ta bo nòmber i fam, fecha di nasementu, riba kua fecha i ora bo ta preferá tin e kombersashon i kua funshon bo ta deseá pa sa mas di dje. Despues via un meil di konfirmashon ta informá kon ta sigui ku e proseso. Pues ta hasi e proseso mas fásil pa e buskadó di trabou. E ‘Speed Date’ via telefon ta riba 15 i 16 di febrüari. Aki tur hende por yama pa medio di ‘Whatsapp Call’. Ta bon pa e hende kuminsá buska informashon, ya pa dia 15 i 16 nan tin algun idea di e trabou ku nan ta deseá. Ta trata di 2 dia di informashon pa loke JICN tin pa ofresé i si di bèrdat bo ta interesá den un di e funshonnan habri, por pone bo mes disponibel i kontinuá ku e proseso. Ta importante pa menshoná ku e ‘Speed date’ no ta un kombersashon di solisitut, pero un kombersashon pa sa mas di e trabou den prizòn i si esaki ta algu pa bo. Pa mas informashon bishitá e website; www.rijksdienstcn.com. 

Share This
error: Content is protected !!