KRALENDIJK – Despues ku ayera kabesantenan di sindikato FEDEBON i USIBO tabata den studio di Radio Live 99.9 FM tokante asuntunan relashoná ku BOPEC, awa tabata turno pa presidente di BPWU Gabriel Pourier ku tabata kompañá pa Benny Martijn.  

Nan a papia tokante e situashon ku BOPEC ta aden i kiko ta pensa ku ta e siguiente paso.  

“BOPEC tin mas o ménos 76 trahadó. Tin hopi ya e kita bai. Mi a bisa nan; si tin algu otro presentá, bai pé pasobra e asuntu di BOPEC no ta dura hopi mas. FEDEBON a gana referèndem pa representá trahadónan. Mi a pidi reunion ku FEDEBON i a splika nan ku nos no por kuminsá ku guera, mester hasié na òrdu. Nos a kana tur proseso i tur kos a kana bon, despues diripiente a sali den korant; FEDEBON i USIBO a reuní ku un invershonista. Nan a bisa ku nan a kere paso mi ta trahadó i a bai atendé nan so. Mi a proponé pa organisá un manifestashon i entregá karta i despues a bisa nan ke tene un wèlga. Mi a bisa nan esei no por. A pone tres proposishon riba mesa. A bai playa ku e meta pa laga gezaghèber sera BOPEC, debí ku e lugá no ta kumpli ku seguridat. Esaki a sosodé sin BPWU. E kos ta; sesantia ta ku doño di kompania bo por atendé i no ku gobièrnu. Coredor tin kontakto ku gobièrnu di Boneiru i Hulanda. Coredor no por a drenta Boneiru debí na e situashon di CoViD-19, no ku no tabata deseá su bishita na Boneiru. Loke si nan a nenga pa Coredor yega Boneiru, momentu el a informá ku e ta trese sèn kèsh pa Boneiru den avion privá. A bisé ku no ta pèrmití esei, pues e no por a bin. I momentu ku nan manda sèn pa Boneiru, otronan ta pone beslag riba dje. Mi a kaba papia ku Coredor awe i el a bisami nan ta bai atendé pa por bin Boneiru. Mi a manda un karta pa Coredor pa entre otro si nan manda sèn, manda e parti di sesantia di biaha. Loke mi por komprondé i sinti ta ku dia 15 di febrüari BOPEC lo no risibí sèn pa paga trahadó.

Trahadónan ke bai traha, sinembargo sindikatonan ta tene nan afó. Mi a bisa gezaghèber pa e wak bon pa nan no uz’é. BOPEC no ta insigur pa hende. No tin problema pa hende ta riba tereno. Ta for di 2017 e problemanan a inisiá. Echi Manuel por a hasi kambio pa kontinuashon, sinembargo e no a hasié. Mi a bisa trahadónan; despues di awe tur kos ta den nan man. Meskos mi a bisa Coredor tambe. Ya tin 2 aña ku BOPEC no ta funshoná. Tur sèn ta blòkiá i no por hasi nada. Legalmente RDK ta atendé ku BOPEC. E tin beslag riba e lugá i ta nan por disidí kiko tin ku hasi. Ami ta dispuesto pa traha huntu ku otro sindikatonan pa yega na un bon solushon pa e trahadónan. Nos mester papia i bai huntu pa nos ta fuerte i logra sèn pa e trahadónan. Esei ta e meta final. Tin kombersashon ku PDVSA kaminda ta papiando ku entre otro 2 grupo, pa tuma BOPEC na nan enkargo i kontinuá. Djamars awor Coredor ta bai papia ku trahadónan pa medio di konferensia di video. Pues laga nos warda i tende kiko ta bin riba mesa djamars awor”, Gabriel Pourier di BPWU a bisa.  

Share This
error: Content is protected !!