KRALENDIJK – Durante fin di siman pasá, anti sosial(nan) a subi pa kibra dak i plafònt i baha den e tienda pegá ku misa di Antriol. Ta trata di “Coromoto Giftshop”, ku ta bende diferente artíkulo, ku e meta pa rekoudá fondo i hasi trabou relashoná ku misa La Bírgen di Coromoto. “Un desapunto awe bispu di San Valentino, habri porta i topa un desaster, kaminda a kibra dak drenta bai ku algun armbant i un montante chikí di sèn. Mi shon ‘ladron’ abo ku a drenta ei, Dios bendishonabo. Mi ta spera bo a bai ku un beibel i un krus pa bo resa. Nos tambe ta resa i pidi Dios pordonabo. Bo por a pasa un dia pa wak den e tienda, ku no tin kos di balor òf kos di marka karu. Simplemente kos ku tin di aber ku religion”, pader Marc Hooischuur a bisa. Pader Alphonsus Baak, kende a yega na e idea i a laga traha e “Giftshop”, tambe a ekspresá su desgustu di loke a sosodé. Esaki el a hasié pa medio di Facebook, miéntras e ta biba awor na Kòrsou. “Meskos ku e paralítiko den evangelio. Hesus a bis’é; bo pikanan ta pordoná.” Kualke persona ku por a mira algu, òf sa di un persona ku no tin kustumber di bende armbant (no di marka), tuma kontakto ku polis òf Pastor Marc Hooischuur.

Share This
error: Content is protected !!