KRALENDIJK – Manera nan ta bisa; inkreibel pero bèrdat. Na Boneiru tur kos ta posibel. Esaki ta loke tabata ekspreshon di un habitante di Kaya Carlos A. Nicolaas. Durante fin di siman pasá, algu mas ku 2 siman ku a kaba habrie, despues di a tuma mas ku 5 luna pa asfaltá Kaya Carlos A. Nicolaas i bisindario, a koba awor na rant di e kaminda. Esaki ta notabel, ku e por suak e fundeshi, debí ku ta koba nèt na rant di e kaminda ku ta di betòn, trahá spesial pa protehá e kaminda di asfalt pa e no kibra. Mas kla ku di dia; no tin komunikashon, no tin palabrashon, idea òf konosementu pa e trabou. Sigur 5 pa 6 luna, e kaya tabata den konstrukshon. Niun hende no por a pensa ku mester pasa loke ta koba pa pasa awor? Momentu ku pone un hulandes oropeo den posishon pa hasi sierto trabou, ta tende e gritu; dikon makamba i no yu di tera. Esaki ta resultado di nos hendenan. P’esei mester intervení e hulandes, pa hasi e trabou korekto den sierto posishon. Potrètnan ta papia pa nan mes. No mester di splikashon. Ta lamentabel ku no ta promé biaha esaki ta sosodé nèt despues ku kaba asfaltá un kaya. No ta probechá tur e lunanan ku e kaya tabata será pa wòrdu asfaltá, awor ta koba na rant di e kaminda. Esaki sigur por kousa daño den futuro pa fundeshi di e kaminda,” e habitante indigná a trese dilanti.

Radio Live99.9FM a buska kontakto ku Martijn Zwiers di e kompania Boneriaanse Wegenbouw Maatchappij (BWM) ku ta enkargá ku e proyekto i el a konfirmá ku a koba na rant di e kaya menshoná. Esaki ta parti di e trabounan pa finalisá e proyekto. Mester a hasi un evaluashon pa tene e kaya será i habri esaki ora tur kos ta kompletamente kla òf pa habri esaki ku tráfiko por sirkulá i kaba hasi e último detayenan. Aktualmente ta pasando pipa i kabel di faiber di e kompania Telbo pa tur e kasnan riba e kaya. E trabounan ta tuma lugá solamente na rant di e kaminda. Esaki por ta molèster pa habitante i usuarionan di e kaya, pero un biaha mas nos ta pidi untiki pasenshi pa nos finalisá e proyekto kompletamente,” Martijn Zwiers di BWM a bisa.

Share This
error: Content is protected !!