KRALENDIJK – Awe djamars mainta pa un òf otro motibu un òf mas persona a sera e kaminda pa yega BOPEC, for di direkshon di Karpata. Radio Live 99.9 FM a haña informashon ku e kaminda ta será i a manda un reportero pa tuma nota loke a sosodé. E reportero a topa bèrdat ku un parti di kaminda blòkia ku baranka. Despues di a sigui kore i yega porta di BOPEC, a papia ku algun trahadó i nan a informá ku nan tambe, meskos ku otronan, a topa ku baranka riba kaminda. Momentu ku e reportero di LiveFM tabata regresá direkshon pa Rincon for di BOPEC, el a tuma nota ku un persona tabata kita e barankanan ku ta den kaminda. A resultá di ta e konosido polis di Rincon Lee Anthony. Huntu ku e reportero i un empleado di BOPEC, a kita tur piedra for di riba kaminda. Por a mira (debí na marka nan ku a keda tras) ku e kaminda den oranan trempan di mainta, tabata kompletamente blòkiá ku baranka. Polis Lee Anthony (na sivil), a bisa ku loke a sosodé no ta bon. Esaki por hinka hende inosente den problema, djis imaginá si algu sosodé i ambulans mester pasa i e kaminda ta blòkiá ku baranka. Riba potrèt e situashon di loke a sosodé awe mainta riba kaminda pa BOPEC.

Share This
error: Content is protected !!