KRALENDIJK – Honor a toka na e ekiponan s.v. Juventus di Antriòl / Playa Pabou i s.v. ATC di Tera Kòrá, pa inisiá kampionato 2021 di futbòl di nos isla djarason awó 17 di febrüari den Stadion Kralendijk na Playa. E partido inisial di e kampionato ta kuminsá 8’or anochi.

Patrick Mariana di Federashon di Futbòl Boneriano(FFB), durante un entrevista relashoná ku e kampionato di FFB 2021 a konta kiko tur por spera. El a papia kon e situashon ta awor ku weganan ta bai kuminsá i mas. “Último temporada kasonan di CoViD-19 a baha esei ta hasi posibel ku futbòl por kontinuá. Esei ta e kaso i djarason 17 di febrüari tin e promé partido den stadion na Playa. E promé partido ta entre Juventus i ATC. E proseso ta andando pa por yega na e konklushon pa por tin fanátiko durante weganan di futbòl. Fanátiko sigur tin influensia riba e hungadó loke ta motivá nan mas durante wega. Ta kuminsá sin públiko, pero por presensiá e weganan pa medio di ‘live streaming’. Tin un plan pa loke ta trata asuntu di públiko den Stadion na Playa. E lugá ta hopi amplio pues por tuma kada banda den stadion, algu mas ku 100 hende. Nos ta sperando un kontesta di gobièrnu si e sei ta bira posibel. Na diferente okashon a hasi intento i no a logra organisá e kampionato di FFB debí na e situashon di e pandemia di CoViD-19. E aña aki e kampionato ta konta ku 10 ekipo ku ta partisipá. Weganan ta riba djarason, djabièrnè i djadumingu. Djarason i djabièrnè wega ta kuminsá 8or di anochi i djadumingu 7or di anochi. E deseo ta pa yega na un palabrashon pa fanátiko por presensiá e weganan. Presidente di FFB djarason ta sinta na mesa ku gezaghèber Edison Rijna pa papia un biaha mas riba e posibilidat pa fanátiko drenta stadion”, Patrick Mariana a bisa.

Despues di e promé partido djarason, djabièrnè awó 19 di febrüari e di dos partido di e kampionato, esaki pa 8or anochi den Stadion di Playa, lo ta entre e ekiponan Atlétiko Flamingo di Nikiboko i e peruanonan di Arriba Perú ku ta bai topa otro pa promé bia den e kampionato. Djadumingu pa 7or di anochi ta sigui Vespo i Young Boys.

Nos ta deseá e ekiponan den e kampionato tur klase di éksito, meskos tambe e federashon di futbòl bou di presidensia di sr. Ludwig “Luti” Balentin.

Share This
error: Content is protected !!