KRALENDIJK – Nos tin e situashon di BOPEC na atenshon. No ta algu ku ta awor nos a tuma nota di dje. Esaki ta loke gezaghèber Edison Rijna a bisa relashoná ku e situashon di BOPEC aktualmente.    

Presidente di BPWU Gerold Bernabela, a bisa siman pasá ku djarason 17 di febrüari, Coredor di PDVSA, lo a papia ku trahadónan di BOPEC pa medio di konferensia di video. Esaki miéntras tantu no a tuma lugá i por komprondé ku awe djaweps 18 di febrüari pa 11or di mainta ta bai tende di Coredor kiko e ta bai bisa i kiko lo ta e siguiente paso relashoná ku BOPEC. Por komprondé ku tur trahadó ta kla pendiente pa tende kiko ta bai sosodé. Nan no a kobra salario e aña aki i tampoko risibí nan bashí preimi. Si awe nan no tende algu konkreto nan lo bandoná tereno di BOPEC.   

“E asuntu di BOPEC ta yegando un punto ku no por kontené su mes mas. Trahadónan for di desèmber aña pasa nan a kobra i no a risibí pago den 2021. Nos komo gobièrnu a hasi tur posibel si resultá ku mester atendé ku trahadónan, gezaghèber Rijna a sigui bisa. Miéntras e doño di BOPEC, esta PEDEVESA  ta den negoshashon ku trahadónan i hasiendo posibel pa nan kumpli ku pagonan, nos tin ku warda pa wak kiko ta kontinuá. Pues e situashon di BOPEC ta di atenshon i nos ta sigui tur kos di aserka. Mi tin diferente kontakto ku hendenan di Hulanda, Venezuela i ta splika nan e situashon pa yega mas rápido na un solushon i trese klaridat den e asuntu di BOPEC. Tin negoshashon andando i promesa di parti di e kompania madre, sinembargo mi no por bisa mas pa awor. Gobièrnu ta prepará pa momentu resultá algu ku trahadónan keda retirá, yega na un ayudo pa nan.” 

Share This
error: Content is protected !!