KRALENDIJK – Un di e metanan di USIBO ta pa krea un aserkamentu di servisio pa miembronan di sindikatonan afiliá. Ta den desaroyo aktualmente un Bentana di Asistensia, kual lo bai duna diferente servisio na miembronan di sindikato en partikular i na komunidat en general. “Un pueblo sin konosementu ta bai pèrdí i ta blanku na abusonan ku por tuma lugá ku violashonnan di su derechonan humano fundamental individual i kolektivo”. USIBO a konstatá hopi ignoransha den nos komunidat en general i serka e klase trahadó en partikular. I komo tal ta sinti su mes yamá pa duna un man den yuda konstruí un komunidat sano, kaminda konosementu, edukashon i siñansa lo ta e arma mas poderoso pa konsientisá un pueblo riba su derechonan. Den e kuadro di e Bentana di Asistensia, USIBO den koperashon ku Servisio di Belasten ta bai organisá nochi(nan) di informashon pa primeramente miembronan di direktiva, delegadonan i miembronan di e sindikatonan afiliá na USIBO kon yena belasten online. Ku e konosementu aki kada sindikato por plama e konosementu atkerí komo un servisio sindikal bou di su miembresia i komunidat en general. E intenshon ta pa riba un término kòrtiku henter komunidat ku tin ku paga belasten tin konosementu kon yena nan belasten. I si bo no tin ekipo elektróniko, manera kòmpiuter, lèptòp òf i-phone ni internèt no ta nada. Esnan ku risibí e informashon lo por yuda tambe den yena e papel sin mas. E intenshon ta pa start ku e anochi(nan) aki den e siman di 8 di mart. Pronto lo sali mas informashon al respekto via e sindikatonan mes, pero tambe atraves di e Boletin Informativo di USIBO.

Nelson Mandela: “Education is the most powerful weapon which you can use to change the world.” Ku e lema aki USIBO ta bai promové pa alsa konosementu di nos sektor laboral riba diferente tereno i asina logra hasi nos sektor laboral uno fuerte, konsiente di su balor den e desaroyo sosial-ekonómiko di nos komunidat.

Share This
error: Content is protected !!