KRALENDIJK – Denter di poko ta bai eliminá Sentro di Bario Antriol i traha un edifisio nobo. Esaki ta loke diputado Nina den Heyer a bisa durante reunion di Konseho Insular resientemente. Despues ku ekspertonan a hasi un investigashon, a yega na e konklushon pa basha e edifisio situá den Antriol pabou’ abou. E plan tabata pa e edifisio a bira ofisina di ‘Family Justice Center’, sinembargo apesar ku tabata bai modifiká e edifisio aktual, a opta pa mihó bash’é abou i traha un nobo. Pues e ofisina di ‘Family Justice Center’ ta bin kaminda awor ta ‘Sentro di Bario Antriol’. Ya pa algun aña no ta hasi uso di e edifisio. Aktividatnan ku por a tuma lugá einan, awor a bai na ‘Plasa Chiku Goeloe’ na Kaya Corona. Diputado den Heyer a sigui bisa ku tabata deseá pa adaptá e edifisio pa e sirbi pa ‘Family Justice Center’. “Ta trata di un sitio ku ta atendé ku damanan ku haña nan den problema debí na maltrato. Ya tin sèn disponibel pa e promé kambio di presupuesto pa 2021, pa realisá e proyekto. Pues sèn pa kuminsá tei i despues mester pone mas pa finalisá e proyekto. Awor ta papiando ku esnan ku ta bai traha den e edifisio i momentu tèrminá ku e fase ei, ta sigui ku diseñamentu di e edifisio nobo. Ta konosí ku e dak di e edifisio aktual ta di asbèst, pues mester atendé esei ku e reglanan pa tur kos bai korekto sin deskuido. Esaki mester tuma lugá promé ku basha e edifisio abou. Tabatin komentario ku e plan no ta kontinuá, sinembargo e proseso ta den ful swin pa yega na e edifisio di ‘Family Justice Center’.  Tur kos ta den preparashon, esta e parti suave di e proyekto. E parti duru manera ta bisa, esta e bashamentu di e lugá abou i konstruí e nobo, ta bin poko despues”, diputado Nina den Heyer a bisa. 

Share This
error: Content is protected !!