KRALENDIJK – 17 di febrüari último tabata djarason di shinishi i despues ku parokianonan a tuma nan krus riba frenta, kuaresma a kuminsá. Ta e temporada di aña kaminda ta rekordá 40 dia ku Hesus a pasa den desierto. Parokia La Bírgen di Coromoto, tabata un di e misanan ku a selebrá Santu Sakrifisio di misa, poniendo e krus di shinishi riba frenta di parokianonan. Misa tabata afisiá pa pader Marc Hooijschuur, kende entre otro a menshoná durante predikashi, ku kuaresma ta trata di temporada pa resa i hasi orashon.    

“Kuaresma ta temporada pa resa i hasi orashon. Nos konosé hende ku ta poko pober i nan ta so i tristu. Esnan ku ta stabil, mester duna e esnan debil un man pa yuda nan. No biba ku e pensamentu di; ike, ike en de rest mag …. Esei no ta e manera korekto pa hende biba ku otro. Ban traha huntu un yuda otro. Ta importante pa yuna den temporada di kuaresma, sinembargo esei no ta nifiká pa pasa miseria. Kome i bebe moderá. Hesus ta bisa nos ta bai kome ménos i bebe ménos. Ta konsiente ku tin mas kos den bida ku mester disfrutá di dje. Bo no ta resa pa yuda hende ku e meta pa haña atenshon personal. Bo ta hasi esei pa Señor. Biba pa Dios den e 40 dianan aki, pa yega na un bida nobo. Ban kuminsá e biahe di kuaresma huntu”, pader Marc Hooijschuur a bisa. Potrèt ta ilustrá hendenan tumando krus di shinishi riba nan frenta i Junella Pietersz, momentu el a haña bendishon spesial, selebrando un aña mas di bida.  

Share This
error: Content is protected !!