KRALENDIJK – Edilse Goeloe a keda nombrá komo direktor nobo di Fundashon Kuido pa Personanan Desabilitá (FKPD). E ta sigui Johan ‘Jopi’ Giskus, e persona ku tabata okupá e funshon pa 12 aña. Giskus a keda nombrá komo direktor di FKPD na aña 2008 i a yega tempu pa bai ku penshun bon meresí. E ta traspasá e batuta pa Edilse Goeloe, kende e último 2 aña aki, a laborá na ZVK/ZJCN, komo (Teamleider beleid en account manager). Promé ku esei, e tabata 5 aña mènedjer di kuido (zorg manager klinische zorg) na Fundashon Mariadal. Na Hulanda tambe el a ehersé vários funshon den maneho. Pues Edilse tin amplio konosementu i eksperensia riba tereno di kuido i maneho. Awor Johan, bon konosí pa ‘Jopi’, ta bai disfrutá di un penshun.

Jopi Giskus durante 12 aña a pèrkurá spesialmente pa un struktura stabil i profeshonalisashon di e organisashon. Nan ta konvensí ku e konosementu i eksperensia ku e direktor nobo tin, lo ta ingrediente pa sigui hiba e organisashon mas dilanti, sano i mas profeshonal pa e siguiente generashon i garantisá kontinuidat di kuido di kalidat. Edilse Goeloe entrante djaluna 22 di febrüari lo ehersé e funshon di direktor pa FKPD.

Nos ta deseá señor Giskus tur kos bon den e siguiente etapa di su bida i ta yama señora Goeloe kordial bonbiní.

Share This
error: Content is protected !!