KRALENDIJK – E ekipo di futbòl s.v. Juventus di Antriòl/Playa Pabou a enfrentá e ekipo di s.v. Atlétiko Tera Kòrá (ATC) den Stadion Kralendijk djarason último den e promé partido bálido pa kampionato di futbòl di nos isla.

Tabata un partido ku a konosé un total di 6 gol di kua e ekipo di Juventus no a bini pa basilá i ta skor trempan den e partido. Na di 2 minüt di e promé tempu, Guiseppe Martis ta habri markador i ta anotá e promé gol pa e ekipo di Juventus ku a bai ariba ku e skor di 1-0. Na di 14 minüt Juventus ta amplia bentaha ku e di dos gol anotá pa Roderick Jops. Na di 29 minüt, Reyshandrick ‘Tutu’ Frans di ATC ta kòrta bentaha ku un gol i ta hasi e skor 2-1 pa medio di un pinalti. Otro gol a kai na di 32 minüt na momentu ku Juan Mendoza a manda Juventus ariba ku skor di 3-1, skor tambe ku e partido a bai sosegá kuné.

Den di dos mitar ATC ta sali por lo goma i na di 57 minüt ta logra kòrta e bentaha un biaha mas i hasi e skor 3-2 ku gol di Reyshandrick Frans ku su di 2 pinalti. Na di 91 minüt, Juan Mendoza un biaha mas ta skor un gol pa Juventus ku un tremendo tiru liber i ta hasi e partido 4-2. E ekipo di Juventus finalmente ta bai ku e viktoria ku e skor final di 4-2 riba e ekipo di ATC.

Rèfri ku a dirigí e promé partido di e kampionato ta Ashier Martines.

Despues di e promé partido djarason, awe djabièrnè 19 di febrüari lo tin e di dos partido di e kampionato, esaki pa 8’or anochi den Stadion di Playa entre e ekiponan Atlétiko Flamingo di Nikiboko i e peruanonan di Arriba Perú. Djadumingu pa 7’or di anochi ta sigui Vespo i Young Boys.

Riba potrètnan e timnan, outornan di e golnan i rèfrinan ku a dirigí e partido.

Share This
error: Content is protected !!