KRALENDIJK – Djabièrnè último e ekipo di futbòl s.v. Atlétiko Flamingo di Nikiboko a topa e ekipo di s.v. Arriba Peru den Stadion Kralendijk den e di dos partido bálido pa kampionato di futbòl di nos isla ku a ranka sali djarason pasá.

E partido aki a konosé un total di 3 gol di kua e ekipo di Flamingo mester a soda pa su viktoria komo ku Arriba Peru no a bin pa hasi wega. E ekipo di Atlétiko Flamingo na di 30 minüt di e promé tempu, ta habri markador ku gol di Naigel Coffie ku ta manda e ekipo ariba ku e skor di 1-0. Na di 37 minüt Arriba Peru ta haña un tiru liber i ta empatá 1-1 ku gol di Esteban Berdugo. Skor tambe ku e partido a bai sosegá kuné.

Den di dos mitar Arriba Peru a sali i ta buta preshon fuerte pero no sufisiente i na di 50 minüt Atlétiko Flamingo ta logra bai ariba 2-1 ku gol di Eliomar Frans. Arriba Peru a hasi su máksimo esfuerso pa purba empatá e partido pero sin resultado deseá. Atlétiko Flamingo finalmente ta bai ku e viktoria ku e skor final di 2-1 riba e ekipo di Arriba Peru.

Rèfri ku a dirigí e di dos partido di e kampionato ta Geofrey Angela.

Despues di e partido djabièrnè, awe djadumingu pa 7’or di anochi, s.v. Vespo di Rincon ta enfrentá s.v. Young Boys di Nort’i Saliña. Por sigui esaki solamente via e sistema di ‘Live Streaming’!

Riba potrètnan e timnan, outornan di e golnan i e kuerpo di rèfri ku a dirigí e partido.

Share This
error: Content is protected !!