KRALENDIJK – Riba invitashon di konsehal Daisy Coffie, a duna oportunidat na diferente presidente di organisashonnan deportivo, pa presentá i papia durante reunion di Komishon Fiho di CoViD-19 den sala di Konseho Insular. A duna nan e oportunidat pa ekspresá tokante deportenan aktivo i no aktivo pa motibu di e pandemia di CoVid-19, tambe plannan ku tin. Por komprondé ku a presentá diferente plan, sinembargo e departamentu di gobièrnu no a reakshoná. Esaki a sosodé ku Federashon di Futbòl Boneriano(FFB). Ludwig ‘Luti’ Balentin, presidente di FFB a splika tokante e situashon. “Kampionato di futbòl FFB mester a kuminsá 28 di ougùstùs 2020. Debí na e situashon relashoná ku CoViD-19, esaki no a tuma lugá. Despues di algun bia di pone i kita fecha pa kuminsá, e siman aki porfin weganan di futbòl a kuminsá den stadion na Playa. Weganan a kuminsá sin fanátiko, loke no ta e manera kustumbrá. E problema mas grandi ku tin ta e parti hubenil. No por kuminsá treinen debí ku niun mayor no ta laga nan yu chikí so den stadion pa trein i e mayor no por keda debí na e regla di CoViD-19. E parti aki nos ta deseá pa yega na un forma ku mayornan por keda treinen, pa e muchanan por kuminsá ku práktika. Un otro punto ta ku nos a risibí un imeil awe promé ku e reunion aki ku ta bisa; ku ta pèrmití 50% di kapasidat i maksimalmente 50 persona den públiko. Stadion di Playa ta karga 1200 hende, 50% di kapasidat ta 600. Nos no ta pidi pa 600 hende, pero sikiera un kuart di e kapasidat. Stadion ta tuma 1200 fanátiko. Si mi laga 50 hende wak e wega, e ta mas gastu ku benefisio. Pues ta preferá pa no laga niun fanátiko presensiá e wega. Nos di FFB a manda tur informashon, plan i pintura pa e departamentu konserní, pa wak kon ta posibel pa por lo ménos un kuart di e kantidat di fanátiko, por drenta pa wak wega di futbòl. Na stadion no ta posibel pa laga un fanátiko wak un parti di e wega i despues saka nan pafó di stadion i laga otro drenta. Esaki ta loke ta sosodé por ehèmpel den un restorant. Mester wak bon kon ta tuma sierto desishon”, Luti Balentin a bisa. Konsehal Eshter Bernabela, a bisa ku el a komprondé ku no tabatin plan entregá. “Pues loke mi ta tende Luti Balentin bisa ku FFB a entregá plan; kua dia esaki a sosodé i si nan a haña un kontesta riba esaki”, Bernabela a bisa. Luti Balentin a bisa ku a entregá e plan for di ougùstùs 2020. “27 di ougùstùs tabata e promé plan, despues òktober i desèmber. A papia ku esnan konserní i nan tabata bon na altura di tur kos. Te dia di awe niun kontesta. Mi ta kòrda bon kon mi tabata sinta dia 28, 12’or di mèrdia na e departamentu i nan ta bisami tur kos ta kla pa kuminsá hunga bala e anochi ei 8or, poko despues nan ta bisa esaki no ta posibel mas”, Luti Balentin a bisa.  

Share This
error: Content is protected !!