Kralendijk – Trabou duru ta tumando lugá tras di kortina, pa hasi e bakunashon posibel. Esaki ta loke kordinadó di bakunashon di departamentu di salubridat públiko, Joey van Slobbe a trese dilanti djabièrnè atardi durante un konferensha di prensa. “Salubridat Públiko ta kontentu ku yegada di e bakuna di Pfizer pa Boneiru. 

Ku e kantidat di bakuna, nos por pasa 2000 hende e di promé angua kontra e CoViD-19. E bakuna di Pfizer ta duna mihó resultado despues di pasa dos angua. Djaluna e promé bakunanan ta bai Fundashon Mariadal pa kuminsá ku bakunashon di personal di kuido. E transporte ta tuma lugá den djùk spesial bou di vigilansia. Na e sitio tin siguridat spesial.   

E bakunanan ta skars. Nos ta hopi kuidadoso ku entrega na e sitionan di pasa angua. A base di e kantidat di sita, nos ta determiná kuantu bakuna nos ta bai kuné na e sitio di pasa angua. Ta importante pa tur hende ku tin un sita, bini na e ora palabrá i na e lokalidat pa pasa angua. Si bo no bini, e ora ei podisé nos por saka ménos bakuna for di un bòter. Esei lo ta hopi lástima. Si di bèrdat bo no por bini, yama mas trempan posibel na 0800 – 0800 pa informá.   

Den e siman binidero nos ta kuminsá prepará e sitionan di pasa angua pa hende di 60 aña bai ariba: For di 1 di mart ta pasa angua riba djaluna, djamars, djaweps i djabièrnè den Kompleho Deportivo Jorge Nicolaas na Playa. For di 3 di mart ta pasa angua riba djárason na Fundashon Cocarina Rincon. Pues ta trata di 2 sitio ku ta pasa angua di e bakuna kontra CoViD-19. 

Gustosamente mi ta konta awor kon for di djaluna 22 di febrüari boso por traha un sita via telefòn òf online pa pasa angua kontra CoViD-19.  

Bo por yama grátis number 0800 – 0800 di e callcenter pa un sita. Ta hasi e chekeo di salú via telefòn. Un empleado ta bisa kua dia bo ta haña e promé i e di dos angua. Ta konfirmá e sitanan via telefòn òf email. Si bo no tin email e ora ei bo por duna adrès di mail di un miembro di famia òf un konosí. E callcenter ta habrí for di djaluna pa djasabra for di 8or di mainta pa 8or di anochi i riba djadumingu for di 10or di mainta te 4or di atardi. Si bo no haña nos mesora na liña, purba un biaha mas na un momentu mas trankil. 

Registrá online ta bai di e siguiente manera: riba e wèpsait https://www.bonairecrisis.com/pap/ ta bini un boton ku e teksto ‘registrá pa bakuná kontra COVID’. Klek riba e boton, e ora ei bo ta haña un formulario di registrashon ku un chekeo di salú. Momentu kaba yena e  formulario, bo registrashon ta kla. Nos empleadonan ta prosesá bo registrashon. Denter di dos dia di trabou bo ta haña e sita pa e promé i pa e di dos angua via email.  E tempu entre e anguanan ta tres siman. Bo no por skohe riba kua dia bo ta preferá pasa angua. Riba e wèpsait tin informashon kiko bo tin ku bini kuné pa e sita pa pasa angua. Bo mester bini ku un ID bálido. Uso di un tapaboka ta obligatorio. Lesa e informashon riba e wèpsait bon promé ku bo bini e lugá di pasa angua. E wèpsait ta alkansabel durante 24 ora pa dia, pues bo por registrá na un momentu ku ta kumbiní bo mas. 

Bo por yama òf registrá online, si por nos ta preferá pa bo registrá online. 

Mi ke bisa algu mas tokante e chekeo di salú. Por sosodé ku na momento di registrashon bo ta tende ku bo tin ku traha un sita ku bo dòkter di kas, promé ku bo haña un sita pa pasa angua. Despues di konsultá ku bo dòkter di kas,  bo por traha un sita via e callcenter. Por ta tambe ku e chekeo di salú ta indiká, ku na e sitio di pasa angua bo tin ku bai e dòkter ku tin einan promé. Nos ta pidibo koperashon, esaki ta pa bo mes salú.  

Finalmente na nòmber di departamento di Salubridat Públiko, mi ke deseá e timnan di bakunashon éksito den nan promé siman di trabou! Nos ta spera ku mas tantu hende posibel ta laga bakuná nan mes”, Joey van Slobbe a terminá bisando.

Share This
error: Content is protected !!