Kralendijk – Audri Statie, enfermera na Fundashon Mariadal durante un konferensia di prensa djabièrnè atardi, a bisa ku ta bai bakuná tur ku tin kontakto direkto ku pashènt. Tambe el a bisa ku ta dediká ku hopi atenshon pa bakuna hende. Na Fundashon Mariadal nos tabata basta okupá ku e delaster preparashonnan pa pasa e promé angua kontra CoViD-19 djaluna 22 di febrüari. Esei ta nos plan di bakunashon. Den e promé fase di e plan ta bakuná trahadónan den kuido ku tin kontakto direkto ku pashènt. Ta trata di enfermera, enfermero, dòkter di kas, trahadó den institutonan di hende di edat avansá, fisioterapista i mas.   

Tin mas o ménos 600 trahadó den kuido ta bini na remarke pa bakunashon. Na Fundashon Mariadal nos ta bakuná riba djaluna 22, djamars 23, djaweps 25 i djabièrnè 26 di febrüari.   

Den e preparashonnan pa bakuná nos a tene kuenta ku e kondishonnan pa pèrkurá pa  pasa angua na un manera seif i ku bakunashon ta di bon kalidat. Asina nos por bisa ku nos a tene nos mes na e reglanan di RIVM. Nos a dediká atenshon na preparashon di e bakuna i kon ta duna hende. Tur miembro di tim di bakunashon a haña un treinen. Nos tin tim médiko i tim ku ta duna sosten, nan ta sòru pa e bakunashon kana sin problema.  

Nos meta ta pa otro siman, 160 trahadó den kuido di salú haña e di promé angua. Nan ta haña e di dos angua despues di tres siman. Esei ke men ku na mart nos ta bakuná e trahadónan den kuido atrobe. Na Fundashon Mariadal ta bakuná e trahadónan den kuido den e edifisio bieu di FORMA. E lugá ei ta basta grandi pa bakuná hopi hende, miéntras ku tur hende por tene nan mes na e reglanan di CoViD-19.    

Nos ta kla pa ranka sali. Nos ta konfia ku e bakunashon den e promé siman i durante e simannan despues, ta bai bon”, Audri Statie a bisa.

Share This
error: Content is protected !!