KRALENDIJK – Diputado di salubridat sra. Nina den Heyer a bisa resientemente, durante un konferensia di prensa, tokante e bakunanan ku a yega Boneiru i ta spera mas hende ta bai tuma e bakuna. “E bakuna nan di Pfizer a yega Boneiru i e personalnan di kuido a kuminsá registrá pa por pasa angua kontra CoViD-19 entrante 22 di febrüari. Ta trata mas o ménos 600 profeshonal ku ta den kontakto estrecho ku pashènt.  

For di djaluna 22 di febrüari, hende di 60 aña i mas por sea yama grátis na 0800 0800, òf registrá online na www.bonairecrisis.com pa traha sita pa bakuná. Tur hende por bakuná den dia. P’esei mi ke hasi un yamada na tur dunadó di trabou pa koperá pa nan trahadó por bai bakuná.  

Komo diputado mi a duna enkargo pa tene un enkuesta, pasobra mi tabata deseá pa tende e motibu ku nos hendenan tin pa bai bakuná òf nò. A base di e investigashon akí mi no por bisa kiko pueblo henter ta pensa di bakunashon. Esaki ta pasobra tin por ehèmpel mas hende muhé ku hende hòmber a partisipá na e enkuesta. Nos sa ku na Boneiru tin mas hende hòmber ku hende muhé. Tabatin tambe mas hende di abla hulandes ku hende di abla Papiamentu ku a kontestá e preguntanan.  

Loke sí mi por bisa, e enkuesta ta duna un bista di loke e hendenan entrevistá ta pensa òf sinti tokante bakunashon. Esei ta informashon balioso.  Esnan ku ta deseá pa bai bakuná, ta bisa ku nan ta haña nesesario pa protehá nan mes i otro hende kontra CoViD-19. Nan ta bakuná pasó nan ke biaha òf pasó nan ke pa Boneiru bolbe bèk na e manera ku nos tabata kustumbrá di biba promé ku CoViD-19. E hendenan ku no ta deseá pa bakuná ta duda si e bakuna ta seif. Nan ta wòri tambe ku e kehonan ku nan por haña riba término largu i kòrtiku despues ku nan a bakuná.  

Den e dianan benidero lo mi hasi uso di loke a sali na kla den enkuesta pa duna informashon mas dirigí tokante bakunashon. Pa mi esei ta balor di loke e enkuesta a indiká. Ta bo eskoho si bo ta tuma e bakuna òf nò.  Ta importante pa bo informá bo mes bon. Ta bon pa no bai tras di hopi ‘fake news’ ku tin tokante bakunashon. Pa informashon verídiko tokante bakunashon, chèk www.boneirukrisis.com

Nos departamentu di komunikashon lo sigui informá boso via e boletin di bakuna, poster i diferente otro material. Tur hende ta liber pa skohe si nan ta bakuná òf nò. Tene kuenta ku mas tantu hende bakuná, mihó nos por yega na dominá e vírùs. Asina nos por bai bèk na e bida ku nos tabatin promé ku Boneiru a kai den gara di CoViD-19”, diputado Nina den Heyer a bisa.  

Share This
error: Content is protected !!