KRALENDIJK – Djadumingu último tabatin e torneo komersial di futbòl di sala, kaminda 4 ekipo a topa ku otro. Ekiponan ku tabata presente tabata: Delfins Hotel, Bras Boer, Delfins Bouw i Street Sharks. E weganan a tuma lugá atardi den Kompleho deportivo Jorge Nicolaas. E tim di Street Sharks a bira un realidat na luna di desèmber 2020 i for di e momentu aya nan ta aktivo. Nan meta ta pa praktiká e deporte bon i representá Boneiru den eksterior. Ya nan tin palabrashon pa bai entre otro Kòrsou, sinembargo tur kos ta dependé di e situashon di pandemia di CoViD-19, pa nan por bia bai na un otro isla pa partisipá na enkuentronan di futbòl di sala. Ta un deporte ku último tempu ta kresiendo i a lanta un organisashon ku ta atendé ku e weganan. E deporte di futbòl di sala ta konsistí di 5 hende riba kancha di ámbos partido. Pues 4 delantero i un kiper. E ekipo di Street Sharks djadumingu a bira kampion, despues ku den pinalti a gana Delfins Bouw. Komo premio e tim kampion a risibí 105 dòler i e tim supkampion 35 dòler.

Share This
error: Content is protected !!