KRALENDIJK – Djaluna 22 di febrüari 2021 tabata un dia históriko na momentu ku a kuminsá ku bakunashon na Boneiru. 166 hende a registrá pa bakuná awe. Zùster Henna Winklaar ta e promé persona kende a tuma e bakuna. Ta trata di e bakuna ku ta protehá hende kontra e malesa di CoViD-19. Henna Winklaar ta laborá pa basta aña kaba na Fundashon Mariadal, awor komo casemanager demensia. “Mi a skohe pa tuma e bakuna, pasobra mi ta traha ku e grupo mas vulnerabel na Boneiru. Banda di esei mi ke protehá mi mes, motivá i stimulá mi koleganan i esnan den komunidat pa tuma e angua”, Henna Winklaar a bisa despues ku el a pasa angua den e edifisio bieu di Forma.   

Diputado Nina den Heyer a para banda di Winklaar ora ku el a pasa angua. Despues Den Heyer a duna Winklaar na nòmber di Kolegio Ehekutivo un bukèt di flor i yam’é danki. ‘Bo ta un fuente di inspirashon i un ehèmpel kon hende muhé na Boneiru ta skirbi historia di nobo,’ asina e diputado a bisa.   

Relashoná ku esaki, entre otro Gezaghèber Edison Rijna, a deskribí e dia komo un momentu históriko kaminda a fortifiká nos komunidat den e lucha kontra e pandemia. “Mi ta hopi kontentu i awe ta un dia hopi importante. For di dia e bakuna a yega Boneiru, mi a bisa ku esaki lo ta e komienso pa trese un fin na e pandemia di CoViD-19, ku ya tin kasi un aña ta bai. Ku e bakuna kontra CoViD-19, e hende ta fortifiká su mes, evitá ku e bakuna ta sigui desaroyá riba e isla”, gezaghèber Edison Rijna a bisa. Representante di Reino interino Jan Helmond a ekspresá e speransa ku tur hende na Boneiru lo laga bakuná nan mes.  

Dr Giovanni Frans direktor di Fundashon Mariadal, a bisa e ta spera ku gran parti di trahadó den kuido a pasa e bakuna kontra CoViD-19. “E hende (enfermera) ta liber pa skohe sinembargo e ta bon pa nan ta protehá nan mes, pasobra e bakuna ta seif. Ta bon pa menshoná, ku un kantidat grandi di enfermera a pasa e bakuna kontra grip. Nunka promé nos no tabatin un kantidat asina haltu ku a pasa e bakuna. Pa bisa di e bakuna kontra CoViD-19, ya miónes di hende a pas’é i e ta seif pa hende. A tene diferente sekshon di informashon na Fundashon Mariadal i ta keda na kada personal di kuido, e desishon ku nan ta tuma sea si òf no pa tuma e bakuna kontra CoViD-19. COVID ta pone preshon riba kuido na nos isla i riba personal di kuido. Awor ku pasamentu di angua a kuminsá, ta spera ku Boneiru ta logra dominá COVID-19.”, dr Giovanni Frans a bisa.    

Durante e sekshon di pregunta a puntra entre otro ku tin plan pa atendé ku e telefon ku hopi hende ta bèl i ta bisa e ta okupá. Esaki ta e number di telefon di e ‘call center’ 0800-0800. E liña di telefon debí ku tin hopi yamada ta drenta na mes momentu, tin plan pa amplia esaki, apesar ku ya a hasié resientemente.

For di djaluna 22 di febrüari profeshonal di kuido i hende di 60 aña bai ariba por registrá pa tuma bakunashon. Espektativa ta ku na fin di e siman aki tur personal di kuido a haña e promé di e dos anguanan di e bakuna di Pfizer. For di djaluna 1 di mart por bakuná hende di 60 aña bai ariba na Sentro Deportivo Jorge Nicolaas na Playa. Riba djárason 3 di mart hende di 60 aña bai ariba por laga bakuná nan mes na Cocari na Rincon.

Share This
error: Content is protected !!