KRALENDIJK — Djasabra último a tuma lugá un partido di futbòl amistoso entre e ekipo di biar ‘Mastertouch’ kontra e banda krioyo JC & Friends.  

E partido a kuminsá 7or di anochi den stadion Antonio Trinidad na Rincon. Mirando e situashon di Covid, a opta pa no propagandá e partido pa evitá aglomerashon di fanátiko.  

E partido tabata interesante, mirando ku tur dos ekipo a bin bon prepará, fuerte i hambrá pa gol. Tabata ‘JC & Friends’ ku a habri e markadó i ta bai dilanti 1-0 pa medio di un outo gol. ‘Mastertouch’ a reakshoná rápido i ta haña un tiru liber i ta empatá 1-1 ku gol di Bertje. Skor tambe ku e partido a bai sosegá kuné.

Den di dos mitar, ámbos ekipo a purba ku diferente atake i tabata ‘JC & Friends’ ku a pika dilanti, pa despues a amplia e bentaha ku dos gol mas. Den e último 10 minüt di e partido, e ekipo di ‘Mastertouch’ a sa di reakshoná i no a bende nan kueru barata i empatá e partido den pitu. E partido a terminá ku e skor final 3-3. Despues di deliberashon a disidí ku ta tira pinalti pa saka un ganadó di e partido amistoso aki entre ekipo di biar ‘Mastertouch’ i e banda krioyo JC & Friends. E ekipo di ‘JC & Friends’, ta bari ‘Mastertouch’ ku gol i gana 4-1 den pinalti. 

Sigur un partido hopi sosial i por a mira diferente hóben ku no sa hunga futbòl, praktiká esaki riba nivel.  

Outornan di e golnan ta:  

‘Jc & Friends’: Rutger Thode i Raydolf Felix. 

‘Mastertouch’: Edelbert Winklaar, Rachid Pauletta i Zarquion Statie.

Di parti ‘Mastertouch’, nos a komprondé ku debí ku a para kampionato di biar di nos isla, nan ta sigui move den diferente otro deporte, pa tene e ekipo huntu. A plania tambe un partido di sòftbòl, entre e mesun timnan ariba menshoná.

Share This
error: Content is protected !!