KRALENDIJK – Djarason atardi den kurá di Kas Sindikal, USIBO asistí pa Fedebon i Bpwu a duna un atardi di informashon na tur e trahadónan di BOPEC. A trata un total di 8 punto, nan ta:

1. Fondonan ku a sobra riba e kuenta escrow.

A palabrá ku lo bai buska un moda pa e fondonan ku a sobra riba e kuenta apart i ku tabata destiná entre otro pa paga salario pa di un òf otro manera nan ser repartí bou di e trahadónan.

2. Seguridat riba e terminal;

Den esaki e sindikatonan huntu ku USIBO ta den konsulta ku gezaghèber pa garantisá seguridat di e terminal.

3. Ayudo Sosial di parti di OLB

Di parti di Gobierno di Boneiru, e departamento di Komunidat i Kuido a duna amplio informashon na e trahadónan kiko ta e ayudo sosial ku Gobièrnu ta ofresé i kon e petishon pa esaki mester keda formulá, Tambe e unidat nobo di Plenchi di trabou a duna amplio informashon kon e unidat aki por intermediá riba merkado pa orientá ki posibilidat di trabou ta eksistí.

Enfátikamente a mustra e trahadónan ku e ayudo aki no ta nifiká ningún momento so ku nan, esta e trahadónan a duna indikashon ku nan a terminá nan relashon di trabou. Tur trahadó di BOPEC ta den servisio di BOPEC te ora esaki den un forma legal keda termina i den esaki nos leinan ta kla i raspá.

4. Sesantia

A informá e trahadónnan ku a hiba kònbersashon ku unidat sosial i di labor pa esakinan prepará pa si dado kaso BOPEC no por paga sesantia, ku gobièrnu di Ulanda lo paga esaki. Ketu bai USIBO ta di opinión ku mester bin un plan sosial pa kubri un temporada definí e pérdida di salario ku e trahadónan ta sufriendo. Awor nos ta yegando e di dos luna ku e trahadónan no a risibí nan salario mientras ku no a paga e bashi premie tampoko na yanuari.

5. Doorstart.

Un di e posibilidatnan pa tene BOPEC habrí ta e asina yamá doorstart. Kon eksaktamente mester logra esaki, sindikatonan huntu ku nos hurista ta diskutiendo internamente i nos ta risibiendo konseho for di diferente ángulo, tantu for di Boneiru, komo for di otro partinan den Reino Ulandes.

7. Huisio Sumario

Entre tantu personal di staf i FEDEBON a entregá un petishon via Korte pa un Huisio sumario pa haña e sentensia pa BOPEC paga salario atrasá ku tur e interesnan legal, pero tambe pa ordená BOPEC pa sigui paga e salarionan di akuerdo ku e konvenio laboral den futuro tambe. Ku e sentensia aki riba papel trahadónan tin un título pa aktua kontra no kumplimento di BOPEC pa ku su konvenio laboral ku e tin ku boso. Entre tantu BPWU tambe lo djòin den e Huisio Sumario ku a keda stipulá pa tuma lugá 5 di mart próksimo.

8. Situashon aktual na BOPEC

Djaweps mainta trahadónan di BOPEC riba invitashon for di Caracas a tene un reunión ku e speransa ku lo a bin un klaridat den e situashon. Sin embargo e reunión a desaroyá den e storianan di kustumber pa ya kasi un aña i mei, esta yen promesa i mas promesa sin ku por a duna ningún klase di garantía. Komo protesta tur trahadó a lanta bai i bandoná tereno di BOPEC indikando na gerensia ku dia nan ta kla pa paga salario atrasá i duna garantía ku lo sigui paga, yama nan pa bin traha bèk. Mesora sindikato a informá gezaghèber di e situashon i a pone gerensia te hasta personalmente responsabel pa e situashon kreá i pa kualkier daño material o inmaterial ku lo por kousa na e trahadónan. Pues aktualmente no tin e forsa laboral normal riba e terminal i ta responsabilidat di gezaghèber i gobiernu Ulandes pa tuma e pasonan nesesario pa garantisá seguridat.

Den kurso di siman USIBO lo mantené komunidat informá di kualkier desaroyo relashoná ku BOPEC.

USIBO kier deseá tur trahadó i nan famia hopi forsa den e tempu difisil ku nan ta pasando i por sigurá ku nos lo hasi tur loke ta humanamente posibel pa yuda pensa pero tambe akshoná pa buska un solushon duradero di e problema. Miéntras tantu ta bai un suplika na tur trahadó pa para fuerte i uni, sostené otro moralmente i ser konsiente ku ta boso muf di sali pafó ta pone ku tur otro pionnan i aktornan mester aktua AWOR. I e dos tres trahadónan ku ta paden ainda, sali bin afó i uni boso ku boso kompañeronan di trabou. Ta boso interés boso mester defendé i no esun di gerensia ku a faya ku boso. Ta huntu so nos por vense.

Share This
error: Content is protected !!