KRALENDIJK – Djarason 24 di febrüari último den oranan di anochi na un bar/restorant na altura di e rotònde na Hato, ofisialmente a bira konosí ken ta forma parti di e frònt nobo di e agrupashon musikal Fenty Music ku awor ta karga e nòmber ‘Fenty 4 Life’! (F4L). T’asina ku pa basta luna kaba tabatin diferente spekulashon ken lo por ta e kantantenan/músikonan ku lo bai forma e frònt di 3 di Fenty. E promé nòmber ku tabata sirkulá pa basta tempu tabata Ron Martis, eks kantante di Buleria ku a bin biba Boneiru. Pero e nòmber aki pa awor sigur no ta den e plan di e agrupashon mas, ounke no ta deskartá posibilidat pa den futuro. Otro nòmber ku tabata zona den kaya ta e konosido Michealangelo ‘MJ’ Martina di One Flavaz ku algun dia pasá a yega Boneiru ku su famia pa biba.

Pa lokual ta kantantenan di Boneiru mes, nòmber di Capella Chirino i CliftenJohn Martines ta esunnan ku mas tabata zona. Capella Chirino no ta un deskonosí aki na Boneiru i tampoko den Reino i ya den pasado tabata forma parti di Fenty Music huntu ku Danny Yanga i Gerald Alberto. CliftenJohn Martines, un hóben multi talentoso ku aparte di ta kantante, por dominá diferente instrumènt, pa algun tempu tambe ta bek na Boneiru despues di un temporada na Hulanda. CliftenJohn na edat mas yòn tabata forma parti di e grupo krioyo Kara Kòrá i despues Rítmiko Timon Krioyo. Na Hulanda, CliftenJohn a forma parti di Orquesta Bermuda. Na su yegada aki na Boneiru, el a regresá komo kantante den frònt di Timon Krioyo.

Un etapa nobo ta bai kuminsá. E kòmbersashonnan ta asina leu ku a invitá MJ, Capella i CliftenJohn pa pone tur kos riba papel di forma ofisial. Esaki a tuma lugá djarason anochi algu despues di 8’or. Tur tres kantante ku ta forma parti di e frònt nobo di Fenty 4 Life a basha firma i tin un kontrato di trabou ku e agrupashon musikal pa lokual ta e diferente presentashonnan ku ta bai tin. E tim di maneho di Fenty 4 Life ku tabata presente, ta hopi satisfecho ku loke ta na kaminda pa Boneiru. Ta trata aki di Faysel Francisco, Janou Troeman i Shermantha Frans. Pronto lo bai tin un konferensha di Prensa pa asina komunidat di forma ofisial por sa e plannan ku Fenty 4 Life tin pa futuro, loke por spera di nan, presentashonnan, produkshonnan, emblema nobo i músikonan nobo ku tambe e agrupashon tin. Keda pendiente……

Share This
error: Content is protected !!