KRALENDIJK – Diputado Nina den Heyer a duna diferente informashon relashoná ku e proseso pa bakunashon. El a bisa entre otro ku otro siman ta kuminsá ku bakunashon pa esnan di edat riba 60 aña i Boneiru ta bon prepará pa atendé ku e proseso di bakunashon. E siguiente karga di e bakuna ta yega aki dos siman i asina ta sigui. Hendenan di 18 aña pa ariba, no ta bon konosí, kua bakuna ta bai usa pa nan. Hendenan di 60 aña pa ariba, hendenan indokumentá i esnan den kuido ta haña Pfizer, diputado den Heyer a bisa.   

“Ta trahando riba e liñanan di telefon pa amplia esaki debí na e kantidat di yamada ku ta drenta na mes momentu. Momentu ku un persona yama, kisas e ta zona diferente for di loke nos a kustumbrá kuné, ku por pone bo pensa ku niun hende no ta kue telefon, sinembargo e liñanan ta funshoná i nan ta hopi okupá. Ta bai amplia e kantidat di liñanan i ta importante pa informá, ku na momentu ku un persona yama i e no risibí kontesta, warda un ratu promé ku bo bolbe hasi yamada. No keda hasi esaki tras di otro. No ta nesesario pa tur hende yama tampoko. Awor solamente hende nan riba 60 aña mester yama i traha un sita pa bakuná. E bakunashon di hendenan riba 60 aña ta sigui te 1 di mei 2021. Ta pidi hende di 18 pa 60 aña pa no registrá nan mes awor aki, nan no ta na bùrt na e momentu aki ainda. E motibu ku a pone solamente 1 number di telefon, esta 0800-0800, tabata pa implementé mas rápido. Na momentu ku e persona yama, e por skohe sea pa tèst pa CoViD-19 òf un sita pa bakuná. Aparte di telefon, por traha sita pa bakuná riba e website www.bonairecrisis.com

Despues ku registrá, denter di 2 dia di trabou, bo ta haña un kontesta pa medio di emeil. Ta hopi importante pa tur hende yena nan number di ID korekto i kompletu, sino e sistema no ta asept’é. Ta bon pa un persona usa su propio emeil adrès pa registrá, sino e sistema ta bisa pa hasi yamada i no ta aseptá pa traha sita pa medio di website”, diputado Nina den Heyer a bisa.  

Share This
error: Content is protected !!