KRALENDIJK – Famianan di e hòmber Papa Everts di 45 aña, konosí pa Ministerio Públiko komo ‘Pablo Escobar’, ta hopi desgustá pa e forma ku a atendé durante e entrada hudisial na nan kas den e bario di Antriol. E famia a pidi pa Radio Live 99.9 FM pasa personalmente i publiká loke ku a sosodé ku no ta e forma korekto pa atendé ku hende.

Nan a konta ku ‘ArestatieTeam’ alrededor di 5:30 di mardugá a presentá i a kibra e porta di kas ku ta di glas, innesesariamente. Nan a kibra porta ku ya tabata habrí (no na lòk). Loke a konfiská ta solamente sèn i algu di droga. Loke nan a bin pa buska nan no a haña. A dura mas ku 3 ora den nos kas pa koba tur kaminda kousando destrukshon. A destrui basta kos i bisa ku nan no ta drecha esaki. Nos komo famia di Papa no tin nada kontra e trabou ku e agentenan ta hasi i e investigashon ku tin, sinembargo mester hasié ku rèspèt. No ta solamente Papa ta biba na e kas. Tin hende grandi i yunan menor di edat. Momentu ku nan a arestá Papa, nan tabata deseá pa pasa kuné pia bou den tur e glasnan kibrá na suela kousá dor di destrukshon di e porta. Esaki no ta bon. 

Aparte di e kas, a kibra 4 kuarto den kurá di e kas pa buska i hasi investigashon. E kuartonan no tin nada di aber ku Papa. Ta lugá ku otro hende ta biba aden. I nan sa komo ku no ta promé biaha ta bini aki. Otro kos, polisnan a bai ku ènvelòp ku sèn aden i no a konta e montante ku a bai kuné den nos presensia. Pues awor loke Ministerio Públiko bisa ku tabatin ku nan a konfiská, esei mester kere. Ya den pasado tabatin mal eksperensia ku algu similar i nan a gaña tokante e montante i pone ku nos a pèrdè plaka. Tambe a habri un spar pòt ku un hóben tabata spar den dje. Niun no tabatin di aber ku Papa. Ta poko droga nan a haña ku ta kos di Papa pa uso personal. Mi tabatin un tas i nan a bai ku sèn ku tabata den dje, esta 300 dòler”, e mama di Papa Everts a bisa. Nan ta bisa nan no a kue, sinembargo ta nan so a mishi den e tas. E sèn tabata den e ènvelòp i el a disparsé.

Mainta ora a bai warda di Polis, ya a bisa ku mester di prueba pa por hañ’é sèn bèk. Otro sèn ku tabatin ku nan a bai kuné, ta sèn pa hasi diferente kos, entre otro kumpra kos pa un kas ku e famia ta pendiente di dje. Sèn ku nos a gana di ‘fundraising’. A drenta ku kachó di Duana den kas i a laga e bestia kana riba stul ku kama, kaminda hende ta drumi. Awa a kai i djis imaginá e porkaria ku e bestia a hasi. E kos aki no ta aseptabel. Nos ta hopi mal kontentu e forma ku nan ta aktua. Nos no tin nada kontra ku nan a bin hasi investigashon, sinembargo mester tin rèspèt pa nos tambe duna rèspèt.

Fiskal Altagrasia Martis ta hopi arogante i ta falta rèspèt. Momentu ku nan tabata bandoná nos kas, a entregá un papel ku e motibu di e entrada hudisial. Nan a bisa; ta trata di un investigashon ku ta kanando fo’i 2020. Ta bon pa menshoná, entre e grupo ku a hasi e entrada hudisial, tabatin un funshonario hulandes di Kmar, kende si a trata nos manera un ser humano. Kisas e por sirbi komo ehèmpel pa e otronan. Esaki ta loke e hendenan di e kas kaminda a tene e entrada hudisial, a bisa Radio Live 99.9 FM.

Potrètnan ta ilustrá e destrukshon ku a tuma lugá ku polisnan a bai laga.

Share This
error: Content is protected !!