KRALENDIJK – Dr. Giovanni Frans, direktor di Funadashon Mariadal, ta konvensí ku mayoria trahadó den kuido lo pasa e bakuna. “Di otro banda lo tin tambe un grupo di trahadó den kuido ku no ta di akuerdo pa pasa e bakuna kontra CoViD-19. E ta bai mas leu, e desishon pa pasa e bakuna, ta unu di kada individuo. E no ta un desishon kaminda komo dunadó di trabou, asta ora bo ta un instituto di kuido, ku nos por pone preshon riba un trahadó ku e mester pas’é. Esei no por. Si mi mira por ehèmpel fin di aña pasá, tempu ku nos tabatin un miedu, ku un hende por haña CoViD-19 huntu ku un brote di grip, di e vírùs di ‘influenza’, mi a mira kuantu trahadó di den kuido a pasa e bakuna kontra di grip, nunka nos no tabatin un kantidat asina haltu. Pues mi ta sigur ku na final nos lo tin un grupo grandi di nos trahadónan den kuido ku ta pasa e bakuna. Loke por mira entre tantu e miónes di hende ku a pasa e bakuna, ta ilustrá ku e bakuna e ta seif. Manera zùster Henna Winklaar kende ta e promé persona ku a tuma e bakuna a bisa; bo tin bo mes desishon ku bo ta tuma, pero bo tin ku tene na kuenta tambe ku bo tin ku protehá esnan vulnerabel ku bo ta traha kuné, sea ta pashènt, kliente òf habitante, bo tin ku protehá bo mes i bo koleganan. Esaki ta un ehèmpel hopi klaro ku kada trahadó tin ku tene na kuenta kuné. Durante e último simannan aki, nos a duna informashon na personal, diferente forma, entre otro boletin i a duna e personal informashon na diferente lenga. Pues a hinka hopi esfuerso pa informá e personal di kuido. E desishon final pa tuma e bakuna kontra CoViD-19 ta un desishon di kada trahadó ku e mes ta tuma”, Dr. Giovanni Frans a bisa.   

Share This
error: Content is protected !!