KRALENDIJK – E dama Christeline Josefa ta roga pa yudansa, pa motibu ku ya pa hopi tempu el a pidi Fundashon Cas Boneriano pa yud’é ku un kas, sinembargo te dia di awe nada. Despues di a kana di kashi pa muraya, pasa diferente instansia i no a haña ayudo, el a disidí pa aserká Radio Live99.9FM pa asina tur hende ta na altura di loke ta pasando ku suidadanonan.

“Mi a pidi i roga Fundashon Cas Boneriano, sinembargo nan ta bisa ku no por yudami awor. Mi ta biba aktualmente den un situashon hopi fastioso/deplorabel ku 4 yu. Mi ta un mama soltera i bida ta hopi difísil den e situashon ku mi ta awor. Mi a aserká un trahadó sosial i nan a bin na mi kas i mira e situashon ku ami i mi yunan ta biba aden, sinembargo nada di yudansa. Mi doño di trabou a papia ku e hendenan na Fundashon Cas Boneriano, pa yudami, pasobra e sa kiko mi ta biba den dje. Momentu ku áwaseru kai, semper mi ta yega trabou lat debí na e situashon di e kas ku ta pasa awa. Tambe mi a bai serka Jona Chirino-Felida na su ofisina, aya nan a bisami ku no por yudami awor pa yega na un kas. Ta bisa ku tur mucha tin derecho di biba seif i ku un dak riba su kabes na Boneiru. Dimi nan tin dak riba nan kabes, sinembargo e ta pasa awa. Pues ta mes kos ku nan no tin. E situashon meresé atenshon. Si tabata p’ami mes, mi no ta wòri pa biba den e kas aktual deplorabel. E deseo ku mi tin ta pa mi yunan ta bou di un dak stabil. Nan meresé esei, meskos ku otronan. Unda tur e instansia nan konserní ta? Ora di elekshon tur hende sa unda mi ta biba”, suidadano Josefa a bisa. 

Radio Live99.9FM a buska kontakto ku Sra. Jona Chirino-Felida tokante e kaso aki pero tabata enbano den nos intento.

Share This
error: Content is protected !!