KRALENDIJK – Djarason último den stadion di Kralendijk na Playa, a kontinuá e kampionato di futbòl organisá pa FFB. Ta trata aki e di 4 partido kaminda e ekipo di Uruguay di Antriol Pariba a topa ku Real Rincon di Rincon. Ámbos ekipo pa promé bes a topa otro i tabata un partido bon balansá ku atakenan di tur dos banda. Lacey Pauletta na di 32 minüt den e promé tempu a probechá di un tiru liber ku el a haña i ta habri e markadó 1-0 pa Real Rincon. Esaki ta e skor ku e partido a bai sosegá kuné tambe.

Den e di dos mitar, na di 56 minüt Robert Frans ta oumentá e bentaha despues di a kobra un tremendo tiru liber i ta hasi e partido 2-0 pa Real Rincon. Despues di 3 minüt e ekipo di Uruguay ta korta bentaha i ta hasi e wega 2-1 despues di a haña un pinalti ku a keda kobrá pa Van de Vaart. Jairo Clarenda na di 81 minüt ta kaba ku e speransa di Uruguay ora ku el a hinka un gol pa Real Rincon i hasi e partido 3-1. Esaki tabata skor ku e partido a finalisá kuné tambe. Rèfri ku a dirigí e partido ta Ashier Martines. E kampionato ta sigui awe djabièrnè anochi, na momentu ku Estrellas i Vitesse topa otro den Stadion di Playa pa 8or.

Share This
error: Content is protected !!