KRALENDIJK – Durante un reunion djabièrnè último, e desishon a wòrdu tumá ku djarason awó 03 di mart 2021, tur tres diputado ku ta forma Kolegio Ehekutivo huntu ku gezaghèber di Boneiru lo bai tuma e angua di bakuna. Ta trata aki di Diputado Nina den Heyer, Diputado Hennyson Thielman, Diputado James Kroon i gezaghèber Edison Rijna. Esaki pa stimulá komunidat mas tantu posibel pa registrá i pa demostrá ku e bakuna ta seif. Riba medio sosial entre otro ‘Facebook’ por a mira diferente gritu pa mandatarionan bai tuma e bakuna, komo ehèmpel pa otronan. “Ami si ta bai tuma e bakuna. Mi ta kere den “leading by example” i si mi ta hasi un apelashon riba pueblo pa tuma e bakuna, ta mas ku klaro ku mi mes tambe ta tum’e! Mi ta hasi’e pa mi mes, pa mi yunan, pa mi sernan kerí i mi komunidat! Mi lo keda respetá esun ku tin otro opinion i mi ta pidi pa respetá esun di mi tambe. Nos mester ta ehèmpel pa asina hende mira ku nos mes tambe ta tuma e bakuna”, Diputado Den Heyer a bisa.

Promé Minister di Aruba sra. Evelyn Wever-Croes, Minister Danqui Oduber i Xiomara Maduro tambe a pasa e angua pa trese trankilidat den komunidat tokante e bakuna. Despues di e momentu aki, Aruba a mira un subida di 30% di registrashon. Na Kòrsou Promé Minister Eugene Rugghenaat, Minister Zita Jesus Leito i epidemiólogo Dr. Izzy Gerstenbluth tabata e promé tres personanan ku a pasa e angua di bakuna. Djarason awó 3 di Mart parti mainta ta toka turno na mandatarionan di nos isla.

Share This
error: Content is protected !!