KRALENDIJK – Presidente di Federashon di Futbol Boneriano Ludwig ‘Luti’ Balentin, a papia riba diferente tópiko durante un entrevista na Radio Live 99.9 Fm. Entre otro el a menshoná e situashon kaminda fanátiko no por presensia weganan di futbòl i esei sigur ta stroba entrada pa FFB. “Weganan di futbòl ta tuma lugá ku solamente 50 persona aktualmente. Nos último dekreto ta bisa 50 hende por wak wega. Awor ta sperando di e konsehalnan den Konseho Insular, ku ta bai sinta analisá i wak kon ta posibel pa mas hende por wak e weganan. 50 hende por drenta stadion i no mester paga pa entrada. E ta un pèrdidá pa FFB sinembargo tin ku kontinuá. Nos ta afiliá na CONCACAF pa nan yuda pa por kubri gastunan. Nos a manda e pintura kon nos ta pensa pa por risibí mas fanátiko pa wak wega di futbòl i ta sperando kontesta di esnan konserní, pa por lo ménos 40 porshento di fanátiko por presensia partidonan.  

Nivel di weganan ta hopi bon aktualmente. Tabatin protesta durante weganan resientemente i ta di spera ku ta klara e situashon i ku e no ta ripití. Awor FFB a kumpra un aparato nobo pa kompartí ku ekiponan, pa asina nan registrá tur loke ta sosodé ya asina tin un bista mas amplio kiko ta pasa ku kada ekipo, evitá mal komprondementu. Ta sperando e momentu pa e hendenan ku mester bin splika kon e aparato ta funshoná, pa por implement’e.  

DAMAS 

Awor a kuminsá ku weganan pa damas, kaminda nan ta praktiká wega di futbòl di sala. Futbòl di damas a lanta kabes último tempu i CONCACAF a saka un agènda ku hopi kos relatá na damas. Tambe nos ta bai kuminsá ku e muchanan, pa despues nan ta stabil momentu nan bira hóben i mas edat. Pues tantu mucha hòmber i mucha muhé.  

SELEKSHON DI BONEIRU 

Selekshon di futbòl di Boneiru tin un kompromiso pendiente i awor e ta planiá pa luna di yüni òf yüli. E problema ta di e pandemia di CoViD-19. Sinembargo trabou ta sigui pa pronto hasi e weganan posibel. Real Rincon ta bai partisipá na e ‘Clup Shield’ na Kòrsou fin di luna di aprel. 14 ekipo ta bai kompetí.  

HUBENIL 

E aktividatnan hubenil no a kontinuá debí ku e situashon ku no ta na deseo di e mayornan. Nan ta sinti ku nan no por trese e muchanan i bai laga nan. Ta deseá pa sinta i tuma nota di loke nan ta hasi. Nos a organisá 2 torneo, kaminda 2 ekipo a enfrentá otro. Awor ta importante pa praktiká e sistema nobo. Entrenadó nan a bai treinen i sa kon esei ta funshoná. E ta di tal forma ku ta kuminsá ku un grupo di mucha, ku algun mucha i segun nan di edat ta subi ta oumentá e kantidat di mucha den kada grupo. Esaki ta pa kada mucha ta mas aktivo. Momentu ku e muchanan ta den grupo grandi(hopi mucha huntu), ta resultá ku algun no ta den kontakto hopi ku e bala.   

TERENO DI FUTBÒL

Ta trahando awor riba e vèlt di ATC na Tera Kòrá ku pa mei mei di luna di aprel e ta kla ku yerba artifisial. E vèlt Rudy Boezem na Nort’i Saliña tambe ta bai haña yerba artifisial. Si tur kos kana bon pa luna di òktober Boneiru tin total di 5 vèlt pa praktiká futbòl. E idea ta pa kombertí vèlt Rudy Boezem den un stadion internashonal. Pues e ta bai bira Boneiru su stadion internashonal ku ta kuadra ku tur regla internashonal. Boneiru por hunga tur wega di kas na Boneiru.  

Pa loke ta trata stadion di Playa, ta bai hasi mantenshon i weganan ta kontinuá einan tambe. E idea ta pa den futuro, tur vèlt di futbòl na Boneiru, ku tin yerba artifisial, ta di tal forma ku por hunga wega di futbòl (kampionato di FFB) riba nan. Pues no solamente den stadionnan aktual. Hopi desaroyo tin rondó di futbòl. Meskos ta pendiente pa preparashon di rèfrinan i entrenadó nan. 

Share This
error: Content is protected !!