KRALENDIJK – Den e siman tras di lomba, USIBO a bin tuma nota di un kaso kaminda un dunadó di trabou a abusá di su poder, trapando práktika di un bon dunadó di trabou pa pone un trahadó tuma su retiro boluntario. E violashonnan di e práktika di bon dunadó di trabou ta:

· Den kaso di tuma un desishon ku lo tin un impakto grandi riba e bida di e trahadó, e dunadó di trabou no mester pisa solamente su interesnan di kompania, pero tambe esnan di e trahadó. Den e kaso aki e no a tene kuenta ètòl ku e impakto ku su desishon lo tin riba e bida di e trahadó ku pèrdida di trabou i kuné pèrdida di entrada(salario). Ta asina ku si un trahadó no por ehersé su labor pa motibu di Covid-19 Estado a duna un kompensashon di 80% di e gastunan di salario di e trahadó, miéntras ku e dunadó di trabou mester paga e 20% sobrá a ménos ku e yega na un areglo ku e trahadó òf si tin un sindikato un areglo ku e sindikato. Esaki lei di Kòdigo Sivil den artikulo 1614 c, insiso 7 ta preskribí. E areglo aki ta konta for di 13 di mart 2020 i l o dura te 12 di yüli 2021.

· Un bon dunadó di trabou ta motivá su desishon bon. Den e kaso aki e dunadó di trabou a usa komo motibo ku e tin ku retirá e trahadó, poniendo e trahadó firma su retiro boluntario pa motibunan falsu. Ela usa motibunan di un situashon finansiero-ekonómiko di su empresa komo konsekuensia di e Covid, siendo ku e ta na altura ku pa loke ta e gastunan di salario e no tin ningun doló di kabes, ya ku gobierno a i ta paga e gastunan aki te ku 80% for di 13 di mart 2020 te ku 12 di yüli 2021.

· E bon dunadó di trabou no ta violá e prinsipionan di konfiansa i di igualdat. Den e kaso aki ela primintí e trahadó ku asina kos drecha elo tuma kontakto ku e trahadó. Ya a pasa 8 luna i ningun kontakto(violashon di prinsipio di konfiansa). Ademas e no a apliká e mesun desishon riba e otro empleadonan den su empresa(violashon di e prinsipio di igualdat).

E konsekuensianan di e manipulashon aki pa e trahadó ta multiple ora boluntariamente ela firma su retiro. E konsekuensianan ta:

1. E trahadó a pèrdè su derecho riba sesantia, manera reglá den artikulo 3, insiso 1ª di e lei di sesantia, kaminda e trahadó tin derecho di risibí un kompensashon pa su añanan di servisio. Den e kaso aki e trahadó a laborá 7 aña na e empresa.

2. Ku su retiro boluntario e trahadó no ta bin na remarke tampoko pa e areglo temporal di pèrdida di su salario pa motibu di corona. Esaki lo tabata 80% di e salario mínimo. Un apelashon riba e artikulo aki na SZW a keda rechasá, ya ku nan ta mira e kaso komo un retiro boluntario.

Pues e trahadó pa motibu di e manipulashon aki a pèrdè saku i kangreu. A keda e trahadó solamente un apelashon riba ònderstant (un entrada miserabel). Antó pa kolmo esaki ta mará na kondishon ku si e trahadó su partner tin un entrada di sueldo minimo o mas, e trahadó no ta bin na remarke pa ònderstant.

Kiko ta e daño ku e trahadó aki a sufri dor di pone su firma bou di e retiro.

a. For di 1 di sèptember 2020 e trahadó ta sin entrada.

b. E no por a hasi un apelashon riba sesantia ya ku ta e mes a retirá.

c. SZW a rechasá su apelashon riba e supsidio di 80% di e sueldo mínimo pa motibu ku ela pèrdè entrada pa via di corona..

d. E empresa no a paga e 20% di e loonkostennan riba e periodo di 13 di mart 2020 te dia ku a retiré.

e. E no por apelá riba ònderstant si e no ta kumpli ku e kondishonnan.

f. Inmaterialmente e situashon aki tin konsekuensia pa su salú(stress i otro kehonan di salú).

g. Mirando su edat, 63 aña lo ta hopi difisil pa e por haña otro trabou riba merkado laboral.

USIBO a formulá un karta fuerte pa e empresa konserní pa korigí esaki i a ofresé pa negoshá un solushon mas hustu i rasonabel. Nos ta spera ku e empresa lo realisá esaki i evitá ku USIBO lo mester konsehá pa tuma otro medidanan. Si por regla den konsulta ku otro semper ta di preferá.

USIBO sa ku mas di e kasonan aki a pasa, ta pasando i lo sigui pasa. Pa tal rason un biaha mas nos ta konsehá pa tur trahadó bira miembro di un sindikato i sigur nunka no firma nada ku nan pone bo dilanti sin bo buska un konseho promé. Lei ta duna sufisiente espasio i tempu pa e trahadó por buska konseho promé ku e firma kualkier dokumento ku lo por perhudiké.

Laga e konseho UN HENDE ATVERTÍ TA KONTA PA DOS ta semper bo guía den bida.

Share This
error: Content is protected !!