KRALENDIJK – ‘Street Colors Bonaire’ a tuma despedida di e pintor Tymon de Laat. Esaki a sosodé djasabra último, ku un paseo den bùs na diferente sitio ku a pinta riba muraya. Durante 5 siman e tabata na Boneiru i a kumpli ku e meta na Boneiru. El a logra pa siña i yuda esnan interesá ku e talento i konosementu ku e tin komo pintor. Promé sitio ku a bai tabata na ‘Bonaire Marine Center’. Einan diferente hóben a pinta riba muraya, un kantidat di 6 pintura bou di guia di Tymon de Laat. Louis i Els Posner, doñonan di ‘Bonaire Marine Center’, a ofresé tur hende eiskrim di ‘Tio Pepe’. Nan a pèrkurá pa ‘Tio Pepe’ tabata presente ku su trùk i a parti eiskrim pa tur hende.   

Despues e grupo a sigui pa e muraya blou patras di warda di polis na Playa i debí na un pal’i áwaseru, no por a baha for di bùs na e sitio. Despues a bai ‘Hofi Kultural’, Kaya Kòrsou i Kaya Bonaire. Tabata otro tremendo eksperensia i awor ta kontinuá, kaminda pronto un otro pintor lo bini Boneiru. ‘Street Colors Bonaire’ ta un proyekto di ‘Fundashon Plataforma Kultural’ i  ‘Hòfi Kultural’i ta finansiá pa ‘Fonds voor Cultuurparticipatie’, Fonds 21 i Openbaar Lichaam Bonaire. Pa mas informashon por bishitá www.streetcolorsbonaire.com i instagram @streetcolorsbonaire. Potrèt ta duna un bista di un parti di e aktividat riba e atardi. 

Share This
error: Content is protected !!